“NATO Rusiyanın ona hücum etməyi planlaşdırdığına dair heç bir əlamət görmür”.

Bunu NATO-nun Baş katibi Yens Stoltenberq Şimali Atlantika Şurasının iclasından sonra bildirib.

O deyib ki, ilkin məlumatalara görə, Polşa ərazisinə raketlərin atılması Ukraynaya aid hava hücumundan müdafiə sisteminin fəaliyyəti nəticəsində baş verib.

“Amma, bu, Ukraynanın günahı deyil. Əsl günahkar Rusiyadır”, – Baş katib söyləyib.

O deyib ki, NATO ölkələri sakitliyi qoruyacaq və Polşadakı hadisə ilə bağlı təmasları davam etdirəcək.

Baş katib vurğulayıb ki, Rusiya bu mənasız müharibəni dayandırmalıdır: “NATO ölkələri həmrəydir. Bütün müttəfiqlərimizi qorumağa davam edəcəyik”.

Y.Stoltenberq deyib ki, NATO ölkələri Polşadakı insidentlə əlaqədar məsləhətləşmələrə başlamaq üçün Şimali Atlantika Müqaviləsinin 4-cü maddəsindən istifadə etmək niyyətində deyil.

NATO-nun Baş katibi əlavə edib ki, Ukraynanın hava hücumundan müdafiə sistemləri ilə təchizatı alyans üçün prioritetdir.

Stoltenberq eyni zamanda NATO-nun ciddi qərarlar qəbul etdiyini də deyib: “Mövcudluğumuzu gücləndirmək üçün ciddi qərarlar qəbul etmişik”.

O, baş verən təhlükələrə görə Rusiya Prezidenti Vladimir Putinin məsuliyyət daşıdığını da vurğulayıb: “Ukraynada vacib obyektlər hədəf alınır. Bu, ciddi təhlükədir. Baş verənlərin səbəbi Rusiyanın Ukraynaya hücumudur. Mövcud durumu müntəzəm olaraq qiymətləndiririk”.

O deyib ki, Ukraynada davam edən savaş kifayət qədər təhlükəlidir: “Uzunmüddətli perspektiv üçün qərarlar qəbul edirik. Şərqdəki mövcudluğumuz daha güclü olacaq”.