Ulusal.az xəbər verir ki, Yaponiya Özünümüdafiə Qüvvələri və ABŞ Silahlı Qüvvələri coğrafiyası bütün Yaponiya ərazisinə yayılan genişmiqyaslı Keen Sword təlimlərinə başlayıb. İki ildə bir dəfə keçirilən, zenit və raket əleyhinə müdafiə manevrlərinin həyata keçirildiyi təlimlər noyabrın 1-dək davam edəcək.
Yaponiya Müdafiə Nazirliyinin daha əvvəl verdiyi məlumata görə, hərbi təlimlər zamanı tərəflərin qərargah sistemində birgə hava-desant əməliyyatları, kompleks zenit və raket əleyhinə müdafiə, mühüm infrastruktur obyektlərinin və uzaq Yaponiya adalarının mühafizəsi həyata keçiriləcək. Hər iki tərəfdən hər üç qoşun növü iştirak edəcək: quru, dəniz və hava, həmçinin Avstraliya Silahlı Qüvvələri də qoşulacaq.
Təlimlərdə 45 minə yaxın hərbçi iştirak edəcək: 33 min yapon və Amerika tərəfdən 12 min, eləcə də Yaponiyanın 40 gəmisi və 370 təyyarəsi. Müşahidəçi qismində Avstraliya, Böyük Britaniya, Almaniya, Hindistan, İtaliya, Kanada, Litva, Hollandiya, Yeni Zelandiya, Filippin, Fransa, Cənubi Koreya və NATO-nun nümayəndələri dəvət olunub. Keen Sword təlimləri 1986-cı ildən keçirilir, bu, 17-cidir.
Təlimlər Yaponiyanın şimalında, Rusiya sərhədinə yaxın Hokkaydo adasında da keçiriləcək. Bu münasibətlə Rusiya Xarici İşlər Nazirliyi Yaponiya səfirliyinə şikayət edib. “Yaponiya səfirliyinə adekvat cavab tədbirləri barədə xəbərdarlıq edilib”, – Rusiya Xarici İşlər Nazirliyinin mesajında deyilir. Smolensk meydanı həmçinin qeyd edib ki, “Yaponiya tərəfinə miqyası ildən-ilə genişlənən belə bir təcrübənin, o cümlədən qeyri-regional dövlətlərin, NATO üzvlərinin təlimlərə cəlb edilməsinin qəbuledilməzliyi barədə məlumat verilib”.
