Son illərdə Avropa turnirlərində müntəzəm çıxış edən “Qarabağ” futbol klubu bu mövsüm də böyük hədəflərlə yola çıxıb.
“Qarabağ” FK 2025/26 mövsümündə UEFA Çempionlar Liqasının təsnifat mərhələsinə daxil olub və artıq püşkatma ilə birlikdə növbəti turlara yüksəlmə ehtimalı ciddi şəkildə artıb. Son Azərbaycan çempionu əvvəlcə II təsnifat mərhələsində İrlandiyanın “Shelbourne” klubu ilə qarşılaşıb. Ev və səfər oyunlarında sərgilədiyi üstün performans nəticəsində, “Qarabağ” səfərdə 0-3, evdə isə 1-0 hesabları ilə qalib gələrək toplamda 4-0 üstünlük qazanıb və növbəti mərhələyə keçib. III təsnifat mərhələsində “Qarabağ”-ın rəqibi Şimali Makedoniya təmsilçisi “Shkendija” olub. İlk oyun səfərdə 0-1 hesabı ilə “Qarabağ”-ın qələbəsi ilə başa çatıb və “köhlən atlar” Bakıdakı cavab matçında üstünlük əldə edib.
Qeyd edək ki, “Qarabağ” bu mərhələni keçərsə, playoff turuna vəsiqə qazanacaq və orada Bolqarıstanın “Ludogorets” və Macarıstanın “Ferencváros” komandalarının qalibi ilə üz-üzə gələcək.
Mərc şirkətləri və ya bukmekerlər “Qarabağ”-ın playoff şansının olduqca yüksək olduğunu, Ağdam təmsilçisini bu klublar arasında Çempionıar Liqasının qrup mərhələsində iştirak baxımından daha ön planda olduğunu proqnozlaşdırırlar.
2025/26 mövsümündə Çempionlar Liqasının yeni formatı çərçivəsində yarış daha da rəqabətli və gəlirli hala gəlib. UEFA-nın yeni sistemi üzrə Çempionlar Liqasının qrup mərhələsinə vəsiqə təmin edən hər bir klub əvvəlcədən minimum 18 milyon avro bonus qazanc əldə edir. Bundan əlavə, qrup oyunlarında qələbələr və heç-heçələr üçün ayrılan məbləğlər klubun gəlirinidramatik şəkildə artırır: qələbə üçün təxminən 2,8 milyon avro, heç‑heçə üçün isə 930 min avro əlavə gəlir yaradır. Əgər “Qarabağ” qrupda bir neçə xal toplaya bilsə, klubun qazancı 25‑30 milyon avro səviyyəsinə çata bilər.
