Ermənistan Azərbaycanın ərazisinin 20 faizini işğal etmişdi. Beynəlxalq təşkilatların qəbul etdiyi sənədlərə məhəl qoymayan işğalçı dövlət sülh danışıqlarından yayınır, regionda mövcud status-kvonu saxlamağa çalışırdı. Azərbaycan Respublikasının Prezidenti cənab İlham Əliyev qətiyyətlə demişdi ki, Azərbaycanda ikinci erməni dövləti yaradılmasına imkan verməyəcəyik. Bu qətiyyətli bəyanat da işğalçı dövləti işğalçılıq niyyətindən daşındırmamışdı.
2020-ci il sentyabrın 27-də Azərbaycan Ordusunun hissələri Ermənistan silahlı qüvvələrinin iri miqyaslı təxribatlarının qarşısını qətiyyətlə aldı. Azərbaycan Respublikasının Prezidenti cənab İlham Əliyevin əks-hücum əmri ilə döyüşlər başladı. Azərbaycan Ordusu düşmənin illərlə möhkəmləndirdiyi müdafiə sədlərini darmadağın etdi, mövqe qələbələri qazandı.
Xalqın müharibəsi olan bu müharibədə ordumuz noyabrın 8-də Şuşanı işğaldan azad etdi. Bu qələbə İkinci Qarabağ müharibəsinin sonu demək idi. Azərbaycan ordusu düşmənə qalib gəlmişdi. Üçtərəfli razılaşma Azərbaycanın qalibiyyət, Ermənistanın məğlubiyyət sənədi oldu…
Zəfərdən sonra Azərbaycan Respublikasının Prezidenti cənab İlham Əliyevin müvafiq sərəncamları ilə işğaldan azad edilmiş ərazilərdə quruculuq işləri başladı. “Zəfər yolu” da quruculuq işlərinin tərkib hissələrindən biri idi. Ölkə başçımız dedi: “Qəhrəman övladlarımız dağlardan, meşələrdən, dərələrdən, cığırlardan bu uzun məsafəni qət edərək, qanlı döyüşlərdə düşməni məğlub edərək Şuşaya yaxınlaşıb. Ondan sonra sıldırım qayalara dırmaşaraq, yüngül silahlarla küçə döyüşlərində, şəhər döyüşlərində, əlbəyaxa döyüşlərdə düşməni məğlub edib, torpağımızdan qovub, üçrəngli bayrağımızı Şuşada qaldırıb”. Bu kəlamlar hər bir azərbaycanlını Zəfər qədər qürurlandırır.
Vətən müharibəsi işğalçı dövlətin də, torpaqlarını işğaldan azad edən dövlətin də ordularının xarakterini göstərdi. Azərbaycan Respublikasının Prezidenti cənab İlham Əliyevin dediyi kimi, “Azərbaycan Ordusunda bir nəfər də olsun fərari olmamışdır. Bu, xalqımızın yüksək mənəvi keyfiyyətlərindən xəbər verir. Hərbçilərimiz ölümə gedirdilər, “öldü var, döndü yoxdur” şüarı ilə döyüşlərə gedirdilər, bir nəfər də olsun fərari olmamışdı”.
Zəfər Günü münasibətilə Şuşada təşkil olunan tədbirdə çıxışında Azərbaycan Respublikasının Prezidenti cənab İlham Əliyev Vətənmüharibəsinin xarakterini də, qazanılan Zəfərini də, qürurla yenidən bildirdi. bu amillə bağlı dedi: “Müharibəyə gedən yol bir çox istiqamətlərdən keçmişdir. İlk növbədə, biz özümüz ordumuzu lazımi silahlar və texnika ilə təchiz etməli idik. Bunun üçün də güclü iqtisadiyyat olmalı idi. Azərbaycan müstəqilliyi əldə edəndə bizim maliyyə, iqtisadi vəziyyətimiz çox ağır idi. Ona görə güclü iqtisadiyyatın yaradılması müharibədə qələbənin qazanılması işində önəmli amil kimi nəzərə alınırdı və biz bunu etdik. Bizim iqtisadiyyatımız gücləndi, biz öz hesabımıza yaşayırıq, heç kimin yardımına ehtiyacımız yoxdur, heç kimdən asılı deyilik, özümüz imkan daxilində öz həyatımızı qururuq və yaxşı da qururuq”.
Ölkə başçımızın Şuşada çıxışı hər birimizin bundan sonrakı fəaliyyətimizin başlıca konturlarını müəyyənləşdirdi. Vəzifələrimizi dövlətə, dövlətçiliyə, azərbaycançılığa sədaqətlə yerinə yetirəcəyik.
Səbinə XASAYEVA,
Milli Məclisin deputatı
