Krıma zərbələr Qərb tərəfdaşları ilə razılaşdırılıb.
Ukrayna prezidenti Vladimir Zelenskinin aparat rəhbərinin müşaviri Mixail Podolyak Krıma zərbələrin Qərb tərəfdaşları ilə razılaşdırıldığını, onların Kiyevin yarımadada “Rusiyaya məxsus hər şeyi məhv etmək” ideyasını dəstəklədiyini bildirib.
Siyasətçi xatırladıb ki, bir il əvvəl Qərb müttəfiqləri belə bir ssenaridən imtina etsələr də, indi onlar konsensusa gəliblər.
Podolyak əlavə edib ki, Rusiya ərazisini vuran “naməlum xarakterli” dronların sayı artacaq.
Dövlət Dumasının deputatı, general-mayor Leonid İvlev Podolyakın açıqlamasına reaksiya verib. O, Krımda “Rusiyaya məxsus hər şeyi məhv etmək” niyyətini faşistlik kimi qiymətləndirərək, Rusiya ordusunu Ukrayna Silahlı Qüvvələrinə qarşı hələ istifadə olunmamış sursat növlərindən istifadə etməyə çağırıb.
Parlamentari qeyd edib ki, Kiyevin niyyətlərini ancaq xüsusi hərbi əməliyyat cəbhələrində qələbə ilə dayandırmaq olar. O belə nəticəyə gəlib ki, Ukrayna və onun NATO müttəfiqləri ancaq güc dilini başa düşürlər.
Dövlət Dumasının deputatı Mixail Şeremet isə Podolyakın sözlərinə cavab olaraq bildirib ki, Qərb Krıma qarşı təcavüzə görə Ukrayna ilə bərabər əsasda məsuliyyət daşıyacaq.
Qeyd edək ki, avqustun 22-də Ukrayna Müdafiə Nazirliyinin Baş Kəşfiyyat İdarəsinin rəhbəri Kirill Budanov Rusiyanı “bir daha görəcəksən” sözləri ilə Krıma yeni zərbələr endirməklə hədələyib. O bəyan edib ki, Kiyev hakimiyyəti yarımadada Rusiyaya məxsus hər şeyi məhv etmək istəyir. Buna cavab olaraq Krım Dövlət Şurasının rəhbəri Vladimir Konstantinov Budanova qarşı qabaqlayıcı zərbə endirməyi təklif edib.
Bundan əvvəl Ukrayna prezidenti Vladimir Zelenski Kiyevin avqustun 12-də Krım körpüsünə növbəti hücum cəhdinə görə məsuliyyət daşıdığını etiraf edib.Publika.az
