Amerikalı general NATO-nun Ukrayna müharibəsindəki əsas qorxusundan danışıb.
ABŞ Hərbi Hava Qüvvələrinin istefada olan generalı Filip Bridlav “ABC Action News” telekanalına müsahibəsində hazırda Ukrayna Silahlı Qüvvələrinin döyüş meydanında əldə etdiyi hərbi uğurun Şimali Atlantika Alyansının əsas qorxusu olduğunu bildirib.
Onun sözlərinə görə, indi Qərb ölkələri Ukraynanın qələbəsindən qorxur, çünki prezident Putin Ukrayna münaqişəsinin əvvəlində səslənən qorxudan yenidən istifadə edir.
“Qərb nüvə eskalasiyasından və hərbi əməliyyatların Avropa ərazisinə yayılmasından çox qorxur”, – Bridlav əlavə edib.
O aydınlaşdırıb ki, Rusiya prezidentinin sadiq qaldığı təxribat ritorikası “çılğın” effekt verir və Ağ Ev bu söz savaşına tab gətirir.
“Biz Ukraynaya döyüş meydanında məğlub olmamaq üçün silahlar veririk, amma həm də qalib gəlmək üçün lazım olan hər şeyi vermirik”, – Bridlav vurğulayıb.
