Səudiyyə Ərəbistanının “Əl Nəsri” komandasının yeni futbolçusu Kriştiano Ronaldo Premyer Liqaya qayıtmaq və yenidən Çempionlar Liqasında oynamaq üçün nəzəri imkan əldə edib.Ulusal.az xəbər verir ki, bu barədə “Marca” nəşri yazıb. “Əl Nəsr”lə müqaviləyə əsasən, 37 yaşlı portuqaliyalı hücumçu İngiltərə komandası növbəti mövsüm Çempionlar Liqasına vəsiqə qazanacağı təqdirdə “Nyukasl”da icarə əsasında oynaya biləcək. “Əl Nəsr” və “Nyukasl”ın sahibi İngiltərədə Səudiyyə Ərəbistanının Dövlət İnvestisiya Fondu tərəfindən təmsil olunan Səudiyyə Ərəbistanının vəliəhd şahzadəsidir.
Ronaldonun “Əl Nəsr”lə müqaviləsi 2025-ci ilə qədər nəzərdə tutulub. Onun yeni klubunda təqdimatı yanvarın 3-də baş tutacaq.
Cari İngiltərə çempionatının 17 oyunundan sonra “Nyukasl” 34 xalla üçüncüdür. İlk dörd yeri tutan komanda Çempionlar Liqasının qrup mərhələsinə vəsiqə qazanacaq.
