Ermənistan İstintaq Komitəsi bir sıra şirkətlərin rəhbərlərinin “xüsusilə böyük miqyasda vəsait mənimsəmə”, “qanunsuz yolla gəlir əldə etmə” və “vergi ödəməkdən yayınma” maddələri ilə istintaqa cəlb edildiyini açıqlayıb.
Komitənin yaydığı məlumata görə, araşdırmalar iqtisadi cinayətlər və qaçaqmalçılıqla mübarizə idarəsi tərəfindən aparılır. İstintaqın nəticəsi olaraq, şübhəli şəxslərin saxta maliyyə sənədləri tərtib edib, iri miqdarda vəsaitləri mənimsəyib, sonra isə həmin vəsaitləri yuyaraq dövlətdən milyonlarla dram vergi ödəməkdən yayınmalarına nail olduqları bildirilir.
İstintaq çərçivəsində artıq 11 nəfər barəsində cinayət təqibi başlanıb. Onlardan 5-nə həbs qətimkan tədbiri seçilib, biri barədə ölkədən çıxışa qadağa qoyulub, 4 nəfər isə beynəlxalq axtarışa verilib. Bir nəfərin tutulması üçün isə qərar verilib.
İstintaq Komitəsinin məlumatına görə, xüsusi qrup ümumilikdə 51 ünvanda eyni vaxtda axtarışlar keçirir. Qeyd olunub ki, bu ünvanların əksəriyyəti “Tashir Group”la əlaqəlidir. Lakin mənbənin verdiyi məlumata görə, axtarışların “Elektrik Şəbəkələri” şirkəti ilə birbaşa əlaqəsi yoxdur.
Qeyd edək ki, “Tashir Group” Rusiyada yaşayan erməni əsilli milyarder Samvel Karapetyanın nəzarətindədir. Hazırda istintaq hərəkətləri “Elektrik Şəbəkələri” (HETS) şirkətində də davam etdirilir. Şirkətin Direktorlar Şurasının sədri Narek Karapetyanın evi də axtarılıb.
İstintaq Komitəsinin sözçüsü Kima Avdalyan mətbuata bildirib ki, iqtisadi cinayətlərin istintaqı çərçivəsində “təxirəsalınmaz istintaq hərəkətləri” davam edir və yaxın günlərdə ictimaiyyətə daha ətraflı məlumat veriləcək.
