Rusiyada çıxış edən daha bir azərbaycanlı futbolçu karyerasını ölkəmizdə davam etdirəcək.
Tula “Arsenal”ının üzvü Kamran Əliyev bundan sonra “Sumqayıt”da çıxış edəcək.
O, bir neçə gün öncə Bakıya gələrək “kimyaçılar”ın rəhbərliyi ilə görüşüb. Elə də uzun sürməyən danışıqlardan sonra tərəflər ortaq məxrəcə gələ biliblər.
Əliyev bu gün klub prezidenti Riad Rəfiyevlə birlikdə Antalyada təlim-məşq toplanışında olan “Sumqayıt”ın düşərgəsinə yollanıb. Futbolçu baş məşqçi Samir Abasov ilə görüşdükdən sonra kollektivə təqdim ediləcək. Bundan sonra 25 yaşlı forvardın transferi rəsmən ictimaiyyətə açıqlanacaq.
U-21 milli komandamızın sabiq üzvü “Sumqayıt”da legioner kimi çıxış etməyəcək. Azərbaycan millisində oynamağa razılıq verən Kamran Əliyev Azərbaycan Premyer Liqasında yerli futbolçu statusunda oynayacaq.
Qeyd edək ki, 24 yaşlı hücumçunun Rusiya Birinci divizionunda mübarizə aparan “Arsenal”la müqaviləsi bu ilin iyunun 30-da başa çatmalı idi.
