Milli Məclisin sabiq deputatı, iqtisadçı ekspert Vahid Əhmədov “Sədərək” ticarət mərkəzində baş verən son yanğını şərh edərək, bazarı “SSRİ dövründən qalmış anakronizm” adlandırıb və onun sökülməsinin vaxtının çatdığını bildirib.
Əhmədovun sözlərinə görə, “Sədərək”də yanğın, su basma və digər hadisələr daim baş verəcək, çünki buradakı köhnə konstruksiyalar təhlükəsizlik tələblərinə cavab vermir:
“Bura çadırlar, faner arakəsmələr, qarışıq elektrik xətləri ilə tikilmiş böyük bir bazardır. Hər dəfə yanğın baş verəndə mühafizəçilər və texniki personal vəziyyəti tez nəzarətə götürə bilmir. Halbuki rəhbərlik mütəmadi olaraq FHN müfəttişlərini dəvət etməli, xəbərdarlıq sistemlərini, yanğınsöndürən balonları və hidrantları yoxlatdırmalı idi”.
Qeyd edək ki, avqustun 24-də “Sədərək” ticarət mərkəzində baş vermiş yanğın nəticəsində 13 nəfər xəsarət alıb, sahibkarlara isə ilkin hesablamalara görə 1 milyon manata yaxın ziyan dəyib.
Deputat vurğulayıb ki, bu cür hadisələr həm Fövqəladə Hallar Nazirliyinin işindəki boşluqların, həm də obyekt sahiblərinin məsuliyyətsizliyinin nəticəsidir:
“Bakının müasir ticarət mərkəzlərində belə hallar yaşanmır. Çünki orada yanğın təhlükəsizliyi sistemi lazımi səviyyədə qurulub. ‘Sədərək’ isə artıq öz dövrünü başa vurub. Bu bazarın yerində müasir, mərtəbəli, təhlükəsiz materiallardan inşa olunmuş iri ticarət mərkəzi tikilməlidir”.
Əhmədov həmçinin qeyd edib ki, Azərbaycanın paytaxtında beynəlxalq nümunələrdən yararlanmaq olar:
“Barselonanın yaxınlığında yerləşən La Roca Village adlı iri outlet şəhərciyi gözəl bir infrastruktur nümunəsidir. Oxşar layihə Bakıda da reallaşdırılsa, bu, həm təhlükəsizlik, həm də turizm baxımından böyük üstünlüklər gətirər”.haqqin.az
