2025-ci il sentyabrın 16-da Daşkənd şəhərində tarixi bir mədəni hadisə gerçəkləşəcək. İlk dəfə olaraq, görkəmli bəstəkar, böyük musiqişünas və Azərbaycan musiqi elminin banisi Üzeyir Hacıbəylinin “Azərbaycan xalq musiqisinin əsasları” adlı ölməz əsəri özbək dilində təqdim ediləcək. Təqdimat Yunus Rəcəbi adına Özbək Milli Musiqi İncəsənəti İnstitutunda keçiriləcək və həm elmi, həm də mədəni mühit üçün xüsusi bir bayrama çevriləcək.
Bu nəşr Azərbaycanın Özbəkistandakı Səfirliyinin tabeliyində fəaliyyət göstərən Heydər Əliyev adına Azərbaycan Mədəniyyət Mərkəzinin təşəbbüsü ilə həyata keçirilmiş və tarixdə ilk dəfə olaraq kitab tam şəkildə özbək dilinə tərcümə edilərək nəfis şəkildə çap olunmuşdur. Bununla da dahi bəstəkarın ideyaları daha geniş oxucu kütləsinə çatdırılır, Azərbaycan və Özbəkistan arasında mədəni körpülər daha da möhkəmləndirilir.
Üzeyir Hacıbəylinin “Azərbaycan xalq musiqisinin əsasları” əsəri təkcə bir kitab deyil, milli musiqi düşüncəsinin bünövrəsini təşkil edən, xalq musiqimizin fəlsəfəsini, muğamın incəliklərini, melodiyanın ruhunu elmi əsaslarla izah edən fundamental tədqiqatdır. Bu monumental irs, Azərbaycan musiqisinin zənginliyini sistemləşdirərək onun ümumbəşəri dəyər daşıdığını bir daha sübut edir.
Azərbaycan Respublikasının Prezidenti cənab İlham Əliyevin Üzeyir Hacıbəylinin anadan olmasının 140 illik yubileyinin dövlət səviyyəsində qeyd olunması haqqında imzaladığı sərəncama əsasən təşkil edilən bu tədbir, görkəmli bəstəkarın zəngin yaradıcılıq irsinin özbək tələbələri və musiqisevərləri tərəfindən dərindən öyrənilməsi, onun milli musiqi mədəniyyətinin inkişafındakı müstəsna xidmətlərinin təbliği və gələcək nəsillərə çatdırılması məqsədi daşıyır.
Daşkənddə keçiriləcək bu təqdimat sadəcə bir kitabın tanıdılması deyil, həm də Azərbaycan və Özbəkistan arasında musiqi və mədəniyyət sahəsində əməkdaşlığın yeni mərhələsinə açılan bir qapıdır. Bu tarixi hadisə iki qardaş xalqın musiqi yaddaşını birləşdirərək gələcək nəsillər üçün zəngin bir irs qoyacaq.
Üzeyir Hacıbəylinin ölməz irsi: “Azərbaycan xalq musiqisinin əsasları” kitabının təqdimatı Özbəkistanda
