Ukrayna pilotsuz uçuş aparatları Rusiya neft infrastrukturuna zərbələr endirməyə davam edir. Son həftələrdə bu hücumlar ölkənin emal gücünün əhəmiyyətli hissəsini sıradan çıxarıb və daxili yanacaq qıtlığına səbəb olub. Strateji sahə iflasın astanasına gəlib.
Krizis, Qərbin Kiyevin müttəfiqləri tərəfindən səsləndirilən bəyanatlarla üst-üstə düşür. Onların fikrincə, məhz iqtisadi təzyiq Rusiya prezidenti Vladimir Putini müharibəni dayandırmağa məcbur edə bilər. Politico nəşri yazır ki, üç Avropa rəsmisinin açıqlamalarına əsasən, sanksiyaların və hədəfli hücumların kombinasiyası Kremlin danışıqlar masasına oturmasına gətirib çıxara bilər.
Analitiklərin hesablamalarına görə, hazırda Rusiyanın yanacaq istehsalının 15–20%-i sıradan çıxıb. Bu səbəbdən Moskva benzinin ixracına qadağa qoyub, bəzi bölgələrdə isə yanacaqdoldurma məntəqələrində növbələr yaranıb.
Məlumata görə, neft emalı zavodlarına hücumlar artıq bir ildən çoxdur davam edir, lakin onların təsiri məhz indi ən çox hiss olunur. Qərb dəstəyinin və texniki avadanlıqların olmaması isə Rusiya zavodlarının təmirini ciddi şəkildə çətinləşdirib.
Böyük Britaniya ordusunun keçmiş kəşfiyyat zabiti Filip İngrəm bildirib ki, bu taktika Ukrayna hərbi kəşfiyyatının rəhbəri Kirilo Budanov tərəfindən fəal şəkildə həyata keçirilən “müharibənin əsas hissəsinə” çevrilib.
Onun sözlərinə görə, Rusiya iqtisadiyyatı hələ tam çökmə həddində deyil. Lakin növbəti 12–18 ay ərzində vəziyyət kəskin dəyişə bilər, xüsusilə də Ukrayna hücumlarını gücləndirərsə.
Rusiya hökuməti artıq benzinin ixracına qoyulan qadağanı sentyabra qədər uzatmağa məcbur olub. Bu isə dövlət büdcəsini valyuta gəlirlərindən məhrum edir. Kpler şirkətinin neft analizi bölməsinin rəhbəri Homayun Falakşahi bildirib ki, bu, iri zavodların sıradan çıxmasının birbaşa nəticəsidir. Sentyabrda nəzərdə tutulan planlı texniki xidmət isə yeni dayanmalara yol aça bilər.
“Ukraynaya Ümid” təşkilatının rəhbəri Yuri Boyeçko qeyd edib ki, davamlı iqtisadi təzyiq Kremli artıq bu payız danışıqlara sövq edə bilər:
“Əgər Ukrayna neft infrastrukturuna hücumlarını payızın ortalarına qədər davam etdirərsə, bu, Rusiyada ciddi iqtisadi problemlərə gətirib çıxaracaq və Putini həqiqi danışıqlara məcbur edəcək.”
Eyni zamanda, Avropa İttifaqı yeni – 19-cu sanksiya paketini təqdim etməyə hazırlaşır. Mətbuata görə, enerji sektorunda ciddi məhdudiyyətlər hələlik gözlənilmir. Bununla belə, Brüsseldə ABŞ-ın tarif strategiyasını təkrarlamaq imkanları müzakirə olunur.
