Son günlər Ukrayna Müdafiə Qüvvələri Kupyansk istiqamətində uğurlu əks-hücum həyata keçirərək şəhərin mühasirəyə düşmə təhlükəsini aradan qaldırıb. Ulusal.az xəbər verir ki, bu barədə hərbi ekspert Yan Matveyev öz bloqunda məlumat verib.
Ekspertin sözlərinə görə, cəmi bir həftə ərzində Kupyansk həm tam mühasirə təhlükəsi ilə üzləşib, həm də vəziyyətdən çıxış yolu tapmağı bacarıb.
Matveyev bildirib ki, avqust ayı ərzində Rusiya qüvvələri Radkovka kəndi yaxınlığında mövqelərini saxlayıb və Mirnoye istiqamətində irəliləməyə çalışıb. Avqustun 23–24-də rus piyada bölmələri Sobolevka kəndinə qədər irəliləyərək təqribən üç kilometr dərinliyə daxil olub. Bu vəziyyət Kupyanskın Xarkovdan təminat aldığı R-07 magistral yolunu təhlükə altına salıb.
Hətta şəhərin müdafiəçilərinin kritik vəziyyətdə olması, hətta Kupyanskın təslim ediləcəyi barədə şayiələr yayılıb. Rusiya bölmələrinin müəyyən küçələrə sızdığı təsdiqlənsə də, onların möhkəmlənməsi mümkün olmayıb və Ukrayna qüvvələri planları pozub.
“Lakin həftənin sonuna doğru Ukrayna ordusu təşəbbüsü ələ aldı, Mirnoye kəndini azad etdi, rusları Sobolevkadan sıxışdırıb çıxardı və şəhərin şimal hissəsinə tam nəzarəti bərpa etdi”, – deyə ekspert vurğulayıb.
O əlavə edib ki, bölgədə vəziyyət hələ də gərgin olaraq qalır:
“Düşünürəm ki, rus hücumları davam edəcək. Amma hər dəfə görürük ki, ukraynalılar təhdidə operativ və dəqiq reaksiya verirlər. Onlar qüvvələrini qoruyaraq, ən kritik məqamlarda düzgün tətbiq edirlər”.
Ekspertin sözlərinə görə, Kupyanskın müdafiəsi daha sabit vəziyyətə gətirilib. Şəhərin mühasirəyə alınması cəhdi uğursuzluqla nəticələnib və Ukrayna ordusu bir daha kritik təhlükələrə çevik reaksiya göstərmək bacarığını nümayiş etdirib.haqqin.az
