Ukrayna Təhlükəsizlik Xidməti (SBU) Çin Xalq Respublikasının (ÇXR) iki vətəndaşını “Neptun” raketləri üzərində casusluq ittihamı ilə saxlayıb.
Ulusal.az xəbər verir ki, məlumat agentliyin Telegram kanalında dərc olunub.
“SBU əks-kəşfiyyat xidməti Kiyevdə Ukraynanın “RK-360MC Neptun” raket sistemi ilə bağlı məxfi sənədləri qanunsuz olaraq Çinə ixrac etməyə cəhd edən iki Çin vətəndaşını saxlayıb”, – məlumatda deyilir.
Casusluqda şübhəli bilinənlər 2023-cü ildə akademik uğursuzluğa görə xaric edilmiş Kiyev texniki universitetlərindən birinin 24 yaşlı keçmiş tələbəsi və onun Çində yaşayan və müntəzəm olaraq Ukraynaya səfər edən atasıdır.
SBU-nun məlumatına görə, keçmiş tələbə yeni silahların hazırlanmasında iştirak edən Ukrayna vətəndaşından “Neptun”ların istehsalına dair texniki sənədləri almalı idi.
SBU əks-kəşfiyyatı məlumat aldıqda oğlu, daha sonra isə Ukraynaya gələn atasını saxlayıb. Saxlanılan çinliləri əmlakı müsadirə olunmaqla 15 ilə qədər həbs cəzası gözləyir.
