Avropa İttifaqının (Aİ) analitik mərkəzi Türkiyənin Qərbi Balkanlarda, Cənubi Qafqazda, Yaxın Şərqdə və Afrikada güclü və təsirli aktor olduğunu vurğulayıb.
Ulusal.az xəbər verir ki, Parisdə yerləşən Aİ Təhlükəsizlik Araşdırmaları İnstitutu Türkiyənin qlobal miqyasda yüksələn mövqeyinə diqqət çəkən “Türkiyənin dünyadakı kartları” adlı hesabat dərc edib.
Hesabatda Türkiyənin 4 bölgədə iqtisadiyyat, ticarət, təhsil, mədəniyyət və diplomatiya sahələrində güclü və təsirli olduğu vurğulanıb. Eyni zamanda, Aİ və onun üzvü olan dövlətlərə öz siyasətlərində bu vəziyyəti nəzərə almaları tövsiyə edilib.
Hesabatda Türkiyənin son 20 ildə xüsusilə bu bölgələrə sürətlə genişləndiyi və orada sıx əlaqələr qurduğu bildirilib.
“Mədəniyyət ixracı və texnoloji tərəqqinin bu birləşməsi diplomatik şücaət, iqtisadi genişlənmə və güclü hərbi potensial kimi aydın məqsədləri olan bir ölkənin mənzərəsini yaradır”, – deyə hesabatda bildirilir.
