ABŞ prezidenti Donald Tramp Mərkəzi Kəşfiyyat İdarəsinin (MKİ) və Federal Təhqiqatlar Bürosunun (FTB) keçmiş rəhbərləri Con Brennan və Ceyms Kominin 2016-cı il seçkilərinə Rusiya müdaxiləsi ilə bağlı bilərəkdən saxta məlumat yaymaqda günahlandırılaraq həbs olunmasına etiraz etməyəcəyini bildirib. Ulusal.az xəbər verir ki, bu barədə Ağ Ev rəhbəri The Daily Caller qəzetinə müsahibəsində deyib.
Trampdan Brennan və Kominin həbsdə, qandallı şəkildə televiziya ekranlarında göstərilməsinin onu narahat edib-etməyəcəyi soruşulduqda, o, “Bu, məni qətiyyən narahat etməzdi. Günahkardırlarsa, günahkardırlar. Onlar pis və çox xəstə insanlardır”, – deyə cavab verib.
ABŞ prezidenti əlavə edib ki, Ədliyyə Nazirliyi tərəfindən aparılan istintaq nəticəsində saxlanmaların olub-olmayacağını əvvəlcədən demək mümkün deyil: “Bilmirəm, olacaqmı. Amma olmalıdır”, – Tramp vurğulayıb.
O, həmçinin 2016-cı il seçkilərində əsas rəqibi olmuş Hillari Klinton barədə də danışıb: “Mən keçmiş prezidentin həyat yoldaşının həbs olunmasını istəməzdim, lakin o, tamamilə günahkardır”, – deyə bildirib. Tramp daha əvvəl Klintonun da saxta məlumatların hazırlanmasında iştirak etdiyinə əmin olduğunu söyləmişdi.
Xatırladaq ki, iyulun 18-də ABŞ Milli Kəşfiyyatının direktoru Tulsi Qabbard açıqlamışdı ki, Barak Obamanın administrasiyası Trampın qələbəsindən sonra Rusiya müdaxiləsini sübut edən saxta hesabat hazırlayıb. Onun sözlərinə görə, seçkiyə bir neçə ay qalmış ABŞ kəşfiyyatı yekdil şəkildə Rusiyanın seçkilərə müdaxilə niyyəti və imkanının olmadığını bildirmişdi. Lakin Trampın qalib gəlməsindən dərhal sonra Obama administrasiyası əvvəlki qiymətləndirmələrə zidd olan yeni hesabatın hazırlanmasına göstəriş verib.
Qabbard qeyd edib ki, Rusiya seçkilərin nəticələrinə təsir göstərmədiyinə dair əsas kəşfiyyat məlumatları məxfiləşdirilib. O, məsələ ilə bağlı sənədləri Ədliyyə Departamentinə təqdim etdiyini və bunun məsul şəxslərin cəzalandırılması istiqamətində ilk addım olduğunu vurğulayıb.
Tramp dəfələrlə Rusiya rəsmiləri ilə hər hansı qeyri-qanuni əlaqəsini inkar edib. Moskva da ABŞ seçkilərinə müdaxilə iddialarını əsassız adlandırıb.
