Azərbaycan vətəndaşı Aygün Aydın qızı Mahmudova artıq 17 ildir “Gilan” MMC tərəfindən əmlakının dələduzluq yolu ilə ələ keçirildiyini, bütün məhkəmələrdə bu cinayətin ört-basdır edildiyini bildirir. O, ölkə rəhbərliyinə ünvanladığı müraciətində “Gilan” sindikatını yalnız Prezidentin yumruğu durdura bilər” yazır. Bildirir ki, 2008-ci ildən bəri ailəsi “Gilan” MMC və onun himayəçilərinin cinayətkar oyunlarının qurbanına çevrilib: “Haram qazanc hesabına rüşvət almış məmurlar və onlara qulluq edən satqın hakimlər Allahı unudub. Onlar Heydər Əliyevin vəsiyyətlərini, Prezident İlham Əliyevin göstərişlərindən sanki bixəbərdirlər. Ona görə də bu fikirdəyəm ki, onları yalnız dəmir yumruğunuz nizama sala bilər”.
Aygün Mahmudova “Gilan” MMC-ni Azərbaycanda özəl, heç kimə tabe olmayan, “öz qanunları” ilə yaşayan bir təşkilat kimi təsvir edir: “Rəsmi məlumatlara əsasən, “Gilan” və ona bağlı şirkətlərin ölkədaxili aktivləri on milyardlarla manata çatır. Bu sərvətin bir hissəsi dələduzluq və saxtakarlıqla əldə olunub.
1997-ci ildən Neftçilər prospekti 60 ünvanında yerləşən torpaq və tikili onun mülkiyyətimdə olub. 2007-ci ildə ailəm “Gilan” MMC ilə əmlakın satışı barədə ilkin razılığa gəlib, beh alınıb, lakin sonradan “Gilan” müqavilə üzrə ödəmələri yubadıb. 1 ildən sonra məlum oldu ki, şirkət saxta sənədlərlə ərazini zəbt etdi və oradakı tikilini sökdü. 2008-ci il yanvarın 28-də “Gilan” MMC-nin baş direktoru Cəmil Muradov notariusa rüşvət verməklə mənim adımdan saxta etibarnamə əsasında alqı-satqı müqaviləsi tərtib edib. Mənim yerimə Aidə Bayramova imza atıb. Vergidən yayınmaq üçün torpağın dəyəri 10 dəfə aşağı göstərilib, əsas məbləğ mənimsənilib”.
Məhkəmə müraciətlərindən sonra, Mahmudovanın iddiasına görə, saxta etibarnaməni tərtib edən notarius müəmmalı şəkildə ölüb. Notariusun güllə yarasından ölməsi intihar kimi rəsmiləşdirilib. Qadın bildirir ki, ailəsinə təhdidlər artdıqca, dövlət orqanları susmaqla cinayətkarları qoruyublar. Bütün yerli instansiyalarda iddiaları rədd edilən Mahmudova işini Avropa İnsan Hüquqları Məhkəməsinə (AİHM) daşıyıb. AİHM 18 yanvar 2024-cü il tarixli qərarı ilə onun hüquqlarının kobud şəkildə pozulduğunu tanıyıb. Bu qərardan sonra Ali Məhkəmənin Plenumu 9 oktyabr 2024-cü ildə əvvəlki bütün qərarları ləğv edərək işi yenidən Bakı Apelyasiya Məhkəməsinə göndərib. Lakin Aygün Mahmudovanın sözlərinə görə, hakim Fərrux Qasımov işin “Gilan” MMC-nin maraqları istiqamətində nəticələnməsi üçün hər cür oyuna əl atır: “Hakim vəsatətlərimizə baxmır, sübutları gizlədir, saxtakarlıqları ört-basdır edir. Qanunla cinayətkar oyunları davam edir”.
Müraciətdə ən qalmaqallı iddia 2025-ci ilin avqustunda “Gilan” MMC tərəfindən məhkəməyə təqdim edilən 25 yanvar 2008-ci il tarixli, nömrəsiz, qeydiyyatsız xəzinə ödəniş tapşırığı ilə bağlıdır. Sənədə əsasən, guya həmin gün “Gilan” MMC-nin kassasından Cabir Zaidov adlı şəxsə 1,3 milyon ABŞ dolları ödənilib. “Bu sənəd 17 il ərzində heç bir prosesdə olmayıb. “Gilan” onu 2025-ci ildə birdən-birə təqdim edib. Nə mühasibat uçotunda var, nə də baş mühasibin imzası. Aydındır ki, bu, sonradan uydurulmuş saxtakarlıqdır”.
Mahmudova hesab edir ki, bu “kağız” əsl günahkarları məsuliyyətdən yayındırmaq üçün düzəldilib və Cabir Zaidov günah keçisinə çevrilib.
Aygün Mahmudova iddia edir ki, “Gilan” MMC-nin əsas sahiblərindən biri kimi tanınan Tale Heydərov onun əmlakının talanmasından ilk gündən xəbərdar olub: “Hakim Fərrux Qasımov Tale Heydərovu vicdanlı alıcı kimi təqdim etməyə çalışır, amma sənədlər əksini sübut edir. 2023-cü ilin yanvarında o, “Gilan”dan mənim mülkümü 408 min manata alıb, halbuki onun real dəyəri milyonlarladır. Bu, dələduzluğun davamıdır”.
Məktubun sonunda Aygün Mahmudova birbaşa ölkə rəhbərliyinə müraciət edir: “Xahiş edirəm ki, işə qarışasınız. Məhkəmələrdə “Gilan”la əlbir olan hakimlərin özbaşınalığına son qoyulmalıdır. Mənim müraciətlərim Sizə çatmadığı üçün onları səfirliklər vasitəsilə göndərməyə məcburam”.
“Gilan” MMC-nin və adı çəkilən şəxslərin mövqeyini dinləməyə hazırıq.Musavat.com
