Rusiyada Birinci Kanal, “Rossiya 1”, NTV-nin axşam xəbərlərində Kremlə gecə vaxtı pilotsuz təyyarənin hücumu ilə bağlı kadrları göstərməyiblər.
Ulusal.az UNİAN-a istinadla bildirir ki, bu əvəzində prezidentin mətbuat xidmətinin səsləndirdiyi hücum versiyası Kreml və Qırmızı Meydanın arxiv görüntüləri ilə müşayiət olunub.
“Agentlik”in məlumatına görə, “Birinci Kanal” axşam saat 21:00-da yayımlanan xəbərdə pilotsuz təyyarələrlə baş verən hadisəyə dörd dəqiqəlik süjet həsr edib. Lakin partlayan dronların görüntülərini göstərməyib. Əvəzində tamaşaçılar müxtəlif rakurslardan Kremlin və Qırmızı Meydanın panoramik kadrlarını, hərbi ekspertin müsahibəsini izləyib, həmçinin Kremlin mətbuat xidmətinin ekranda nümayiş olunan mesajlarının mətnini oxuya biliblər. Pərdəarxası jurnalist deyib ki, Kiyev hakimiyyəti bu hücumla “eskalasiyaya təhrik edir” və “təxribat və terror doktrinasını təsdiqləyir”.
Qeyd edək ki, çərşənbə günü gecə Kreml pilotsuz təyyarələrlə hücuma məruz qalıb. Hər iki pilotsuz təyyarə Putinin ofisinin yerləşdiyi Senat Sarayının yaxınlığında təxminən 15 dəqiqəlik fərqlə partlayıb. Hadisə şahidləri və müşahidə kameraları tərəfindən lentə alınan hücum və onun nəticələrinin ən azı yeddi videosu internetdə mövcuddur. Rusiya Dövlət Dumasının deputatları pilotsuz təyyarələrin gecə hücumuna cavab olaraq Ukraynaya zərbələri gücləndirməyə çağırıblar.
Ukrayna prezidenti Volodimir Zelenski qeyd edib ki, Ukrayna nə Rusiya prezidenti Vladimir Putinə, nə də Moskvaya hücum etmir.
