Rusiyanın iyirmidən çox nəhəng sənaye şirkəti, o cümlədən tikinti və avtomobil sənayesinin nümayəndələri, eləcə də məişət texnikası istehsalçıları Sənaye və Ticarət Nazirliyinin rəhbəri Anton Əlixanova məktub göndərərək, xaricdə, o cümlədən dost adlanan ölkələrdən kritik ehtiyac duyulan xammalı ala bilməməsi səbəbindən istehsalın dayanması, iflas təhlükəsi ilə qarşılaşdıqlarını bildiriblər.
Narahatlığa səbəb Avropa İttifaqının (Aİ) Rusiyaya qarşı on dördüncü sanksiyalar paketidir ki, bunun nəticəsində ABŞ, Avropa, Yaponiya və bu yaxınlarda isə Çindən mühüm materialların tədarükü dayandırılıb.
Söhbət ilk növbədə soyuducuların, avtomobil hissələrinin, boruların, poliuretan köpüklərinin, mastiklərin və özünü bərpa edən döşəmələrin istehsalında istifadə olunan polimetilen fenil izosiyanatlardan gedir. Məktubda bildirilir ki, Rusiya iqtisadiyyatı bu məhsullarda yüz faiz idxaldan asılıdır.
Məktubda həmçinin qeyd olunur ki, hazırkı material ehtiyatı cəmi iki ay davam edəcək və sanksiyalardan yan keçməyə kömək edən təchizatçılarla, xüsusən də Səudiyyə Ərəbistanı ilə hələlik razılığa gəlmək mümkün olmayıb.
“RBC”-nin məlumatına görə, Sənaye və Ticarət Nazirliyi ilə əlaqə saxlayanlar arasında “Technonikol”, “Beko”, “Veratek”, “RusTA” və “Verahim” şirkətləri var.
Aİ-nin Rusiyaya qarşı on dördüncü sanksiyalar paketi 24 iyun 2024-cü ildə qəbul edilib. Buraya əvvəllər tətbiq edilmiş məhdudlaşdırıcı tədbirlərin qarşısının alınmasına yönəlmiş bir sıra məqamlar daxildir.
