Son günlər Rusiyada yaşayan və fəaliyyət göstərən azərbaycanlı iş adamlarına qarşı yenidən təzyiqlər müşahidə olunur. Əldə olunan məlumata görə, Azərbaycan əsilli sahibkarlara məxsus ofis və şirkətlərdə yoxlamalardan sonra indi də icarəyə götürülmüş iri ticarət mərkəzləri üzrə müqavilələr birtərəfli şəkildə ləğv edilir.
Politoloq Arzuman Muradlı hesab edir ki,bu proses planlı şəkildə və mərkəzləşdirilmiş bir formada aparılır.
“Sözsüz burada qanunlardan getmir. Görünən odur ki, Kreml öz istəklərinə sahib olmaq üçün yenidən bu prosesi sürətləndirib. Bu birbaşa böyük iş adamlarına, həmçinin tanınmış ziyalılara qarşı başladılan bir yürüşdür. Tanınmış iş adamı Araz Mehdiyevin Rusiya Federasiyasının əsas beynəlxalq nəqliyyat qovşaqlarından biri olan Şeremetyevo hava limanındakı ən böyük “duty free” mağazalar şəbəkəsindən uzaqlaşdırılması, bu tendensiyanın artıq faktiki mərhələyə keçdiyini göstərir.Bu addımlar yalnız iqtisadi deyil, həm də etnik və siyasi motivasiyalı təzyiqlərdir.”– deyə Arzuman Muradlı bildirib.
Politoloq qeyd edib ki, indiyədək baş verənlər Rusiyada azərbaycanlı iş adamlarına qarşı müəyyən qərəzli münasibətin davam etdiyini bir daha nümayiş etdirir.
“Hazırkı vəziyyət, həm də azərbaycanlı diasporunun iqtisadi imkanlarının məhdudlaşdırılmasına yönəlmiş məqsədli siyasətin əlamətidir. Beynəlxalq ictimaiyyət və müvafiq insan hüquqları təşkilatları bu kimi təqib və ayrı-seçkilik hallarına lazımi qiymət verməli, vəziyyətə obyektiv yanaşmalıdır.Azərbaycan ictimaiyyəti və müvafiq dövlət qurumları isə Rusiyada yaşayan həmvətənlərimizin hüquqlarının müdafiəsi istiqamətində zəruri diplomatik və hüquqi tədbirləri həyata keçirməlidir.”– deyə Arzuman Muradlı bildirib.
