Rusiya Federal Tədqiqat Xidməti Stavropol diyarında Azərbaycan vətəndaşını həbs edib.
Ulusal.az Rusiya mətbuatına istinadən xəbət verir ki, onun guya Ukrayna xüsusi xidmət orqanlarına işlədiyi, terror aktları hazırladığı iddia olunur.
Rusiya FTX-nin İctimaiyyətlə Əlaqələr Mərkəzinin yaydığı məlumatda “Ukrayna terror təşkilatına fəal qoşulmuş, onun rəhbərlərinin göstərişi ilə təxribat və terror aktları törətmək üçün nəzərdə tutulmuş bir sıra obyektlərdə, o cümlədən şəhərin hüquq-mühafizə orqanlarının inzibati binalarında, nəqliyyat və nəqliyyat qurumlarında ətraflı kəşfiyyat aparan Azərbaycan vətəndaşı”nın saxlandığı bildirilir.
FTX-nın məlumatına görə, o, “əldəqayırma partlayıcı qurğuların hazırlanması, gizləndiyi yerdə yerləşdirilməsi üçün zəruri olan komponentləri və vurucu elementləri əldə edib və sonradan Azərbaycan Silahlı Qüvvələrinin xüsusi təyinatlı dəstələrində xidmət zamanı əldə etdiyi bilik və bacarıqlardan istifadə edərək, terror aktları üçün bir neçə partlayıcı qurğu yığmaq niyyətində olub”.
Həmçinin iddia olunur ki, istintaq zamanı ondan Ukrayna terror təşkilatının maraqları naminə qanunsuz fəaliyyətini ifşa edən məlumatlar olan partlayıcı qurğuların, rabitə vasitələrinin və elektron yaddaş qurğularının istehsalı üçün komponentlər götürülüb.
FTX Azərbaycan vətəndaşının saxlanması, həmçinin “cinayətini etiraf etməsi” videolarını da yayıb.
Qeyd edək ki, “Pervıy otdel” layihəsi Rusiyada xüsusi xidmətin cinayət əməli barədə araşdırma aparıb. Məlum olub ki, FTX zabitləri özlərini “Ukrayna nümayəndələri” kimi göstərərək Rusiyada insanları “cinayətlər” törətməyə təhrik edirlər. Misal kimi 2024-cü ildə “xarici dövlətlə məxfi əməkdaşlığa” görə 4 il müddətinə azadlıqdan məhrum edilmiş İvan Tolpıqinin işi göstərilir (Cinayət Məcəlləsinin 275.1-ci maddəsi). Hüquq müdafiəçilərinin sözlərinə görə, istintaq işdə göstərir ki, bu şəxs guya adı açıqlanmayan “Ukrayna nümayəndəsi” ilə “münasibətlər qurub və saxlayıb”. Lakin “Ukrayna nümayəndəsi” əslində olmayıb – o, FTX zabiti olub.Musavat.com
