Rusiyanın ATƏT-dəki daimi nümayəndəsi Aleksandr Lukaşeviç: Rusiya Azərbaycan və Ermənistanın Qarabağ münaqişəsinin həlli ilə məşğul olan Avropada Təhlükəsizlik və Əməkdaşlıq Təşkilatının (ATƏT) Minsk Qrupunun buraxılması ilə bağlı birgə qərarını dəstəkləyir.
Lukaşeviç dəqiqləşdirib ki, qrupu 2025-ci ilin dekabrına qədər ləğv etmək planlaşdırılır.
Lukaşeviç izah edib ki, üç qurum öz işini dayandıracaq: Minsk Qrupu, ATƏT-in fəaliyyətdə olan sədrinin şəxsi nümayəndəsinin vəzifəsi və yüksək səviyyəli planlaşdırma qrupu. “Tərəflərin onların saxlanmasının məqsədəuyğun olmaması ilə bağlı mövqeyini nəzərə alsaq, onların ləğvinin qarşısını almaq üçün heç bir əsas görmürük”, – daimi nümayəndə əlavə edib.
Qeyd edək ki, Azərbaycan xarici işlər naziri Ceyhun Bayramov bildirib ki, ATƏT-in Minsk Qrupu və əlaqədar strukturlarının bağlanması ilə bağlı müraciət ATƏT ölkələri arasında yayılıb və 1 sentyabrda qərarın qəbulu gözlənilir.
Bayramov və onun erməni həmkarı Ararat Mirzoyan avqustun 8-də Vaşinqtonda Minsk Qrupu ilə bağlı ATƏT-ə müraciət imzalayıb və avqustun 11-də quruma göndəriblər.
