Türkiyə Prezidenti Rəcəb Tayyib Ərdoğan Türkiyə Böyük Millət Məclisində çıxış etmək üçün Türkiyəyə səfər edən Fələstin dövlət başçısı Mahmud Abbasla görüşüb.
Prezident İqamətgahında baş tutan görüş mətbuata qapalı keçirilib.
Türkiyə Prezidenti Administrasiyasının İctimaiyyətlə Əlaqələr İdarəsindən verilən məlumata görə, görüşdə İsrailin Fələstin torpaqlarında törətdiyi qətliamlar, daimi atəşkəs, sülh üçün atılacaq addımlar və mövcud proseslər müzakirə edilib.
Rəcəb Tayyib Ərdoğan görüş zamanı Türkiyənin Fələstini dəstəkləməyə davam edəcəyini deyib. Türkiyə Prezidenti həmçinin İsrailin qarşısının alınması və beynəlxalq ictimaiyyətin İsrailə təzyiqini artırması üçün çalışmağa davam edəcəyini bildirib.
Rəcəb Tayyib Ərdoğan İsrailin Qəzzada körpələr də daxil olmaqla dinc əhalini qətlə yetirməyə, mülki əhalinin sığındığı əraziləri hədəf almağa davam etdiyini və bəzi Qərb ölkələrinin buna səssiz qaldığını deyib.
Prezident Rəcəb Tayyib Ərdoğan Qəzzada dərhal atəşkəsin təmin edilməsi və fələstinlilərə humanitar yardımın fasiləsiz çatdırılması üçün bütün ölkələrin, xüsusilə də İslam dünyasının səylərini artırmasının vacibliyini vurğulayıb.
Rəcəb Tayyib Ərdoğan həmçinin Mahmud Abbasın Türkiyə Böyük Millət Məclisində çıxış edəcəyindən məmnunluğunu ifadə edib.
Rəcəb Tayyib Ərdoğan Mahmud Abbasla görüşüb
