Ulusal.az xəbər verir ki, Qarsda yerləşən Ani Arxeoloji sahəsində aparılan qazıntılar zamanı Anadolu tarixində mühüm əhəmiyyət kəsb edən yeni bir tapıntı üzə çıxıb. Anadoluda ilk Türk-İslam qəbiristanlığı hesab edilən Ani Səlcuqlu Qəbiristanlığında yeni bir Səlcuqlu türbəsi aşkar edilib.
Arxeoloji tədqiqatlar 2021-ci ildən etibarən bu ərazidə aparılır və hər mövsüm yeni tarixi izlərə işıq salır. Əvvəlki illərdə aparılan qazıntılar zamanı səkkizbucaqlı türbə qalıqları, sist tipli qəbirlər və akit tipli qəbir kameraları tapılmışdı. 2025-ci ildə isə kvadrat gövdəli, kərpicdən tikilmiş yeni bir türbə gün üzünə çıxarılıb.
Türkiyənin Mədəniyyət və Turizm naziri Mehmet Nuri Ersoy sosial media hesabında paylaşdığı açıqlamada bu tapıntının əhəmiyyətini vurğulayıb:
“Türk-İslam tariximizin izlərini Anadoluda izləməyə davam edirik! Ani Arxeoloji Sitatında davam edən qazıntılar zamanı Anadoluda ilk Türk-İslam qəbiristanlığı sayılan Ani Səlcuqlu Qəbiristanlığında ortaya çıxan bu türbə, Anadoluda Türk-İslam dövrünə aid ilk türbə olma ehtimalı ilə böyük əhəmiyyət daşıyır.”
Nazirliyin Mədəni İrs və Muzeylər Baş İdarəsi tərəfindən həyata keçirilən qazıntılar bölgənin Türk-İslam dövrünə aid tarixi mirasının ortaya çıxarılması baxımından mühüm addım hesab olunur.
Arxeoloqlar türbənin kərpic gövdəsinin Böyük Səlcuqlu dövlətinin Anadoludan əvvəlki coğrafiyalarda tətbiq etdiyi dəfn memarlığı ilə oxşarlığını vurğulayır. Bu da həmin türbənin Səlcuq memarlıq ənənəsinin Anadoluda davam etdirilməsinin bir sübutu kimi qiymətləndirilir.
Mütəxəssislər yeni aşkar edilən türbənin Anadoluda Türk-İslam dövrünə aid ilk məzar ola biləcəyini istisna etmirlər. Hazırda türbə və onun ətrafında arxeoloji qazıntılar davam etdirilir.
Bu tapıntı, Ani şəhərinin və ümumilikdə Anadolunun Türk-İslam tarixi baxımından əhəmiyyətini bir daha gündəmə gətirir.
