“Bizə yeni hərbi xidmət modeli lazımdır”.
Ulusal.az xarici KİV-ə istinadla xəbər verir ki, bunu Almaniya Müdafiə naziri Boris Pistorius Bundestaqda deputatlar qarşısında çıxışı zamanı deyib. Nazir bildirib ki, Almaniya 2011-ci ildə dayandırılmış həqiqi hərbi xidmətin bərpasına getməlidir.
Nazir qeyd edib ki, Rusiyanın başlatdığı müharibə Almaniyaya da təhlükə yaradır və ölkə 2029-cu ildə qaçılmaz olacağı görünən müharibəyə hazır olmalıdır: “Bizim müdafiəmizə laqeyid yanaşmağımıza haqqımız yoxdur. Putinin müharibə iqtisadiyyatı növbəti münaqişəyə hazırlıq üzərində çalışır. 2029-cu ilə qədər biz müdafiəyə hazır olmalıyıq və ən pisinin qarşısını almaq üçün çəkindirici tədbirlər görməliyik”.
Boris Pistorius bu problemi həll etmək üçün üç əsas məsələni qeyd edib: “Texnologiya, kadrlar və maliyyə”.
Qeyd edək ki, 2024-cü il üçün Almaniyanın müdafiə büdcəsi təxminən 52 milyard avrodur. Pistorius vurğulayıb ki, maliyyə, materiallar və kadrlar Bundesverin vəziyyətinin yaxşılaşdırılması üçün çox vacibdir.
Nazir bundan sonra da Ukraynanın dəstəklənməli olduğunu xüsusi vurğulayıb: “Putinin bu qədər uzağa getdiyi təqdirdə Ukrayna sərhədlərində dayanacağına inanmamalıyıq. Biz Ukraynanı dəstəkləməyə davam etməliyik. Biz başa düşməliyik ki, Rusiya Federasiyasının qələbəsi bizə Ukraynaya indiki dəstəkdən daha baha başa gələcək”.
