Özbəkistanın birinci prezidentinin qızı, 52 yaşlı Gülnarə Kərimova 2013-cü ildən dəmir barmaqlıqlar arxasındadır.
Ulusal.az “Ozodlik” portalına istinadən xəbər verir ki, o, Daşkənd vilayətinin Zəngiata rayonundakı qadın koloniyasında saxlanılır və mənbənin sözlərinə görə, müəssisə rəhbərliyi üçün “baş ağrısına” çevrilib.
Bunu nəşrə adının çəkilməsini istəməyən qurumun nümayəndəsi “xüsusi məhbus” Gülnarə Kərimovanın saxlanıldığı həbsxanada baş verən iğtişaşla bağlı mətbuatda yayılan xəbərlərə münasibət bildirərkən deyib.
Özbəkistanda yeganə qadın həbsxanası olan Zəngiata rayonundakı 21 saylı koloniyanın əməkdaşının sözlərinə görə, müəssisə rəhbərliyi Gülnarə Kərimovanın davranışı və digər məhbuslara qarşı törətdiyi təxribatlarla bağlı bir neçə dəfə yuxarı rəhbərliyə müraciət etməli olub.
2015-ci il dekabrın 18-də Gülnarə Kərimova Daşkənd Şəhər Məhkəməsinin hökmü ilə 10 il, 2020-ci il martın 18-də isə yeni cinayət işi çərçivəsində 13 il müddətinə azadlıqdan məhrum edilib.
Daşkənd vilayətinin Zəngiata rayonundakı qadın koloniyasının keçmiş məhbusu olan qadın Gülnarə Kərimovanın həbsxanada iğtişaş törətdiyini deyib. Həmin qadın G.Kərimovanın etirazının tarixini dəqiqləşdirməyib, ancaq deyib ki, onun orada dörd çarpayısı var, özünü çarşaflarla hasarlayıb: “Adi yeməkxanada yemək yemir. O, tamamilə sahib olduğu hər şeylə qidalanır. Onun yanına bağlamalar gətirirlər. Heç kim olmayanda maşınlar ora girir. Əgər bir şey istəsə, ona nail ola bilər… Bir sözlə, o, orada özünü pis hiss etmir”, – keçmiş məhbus bildirib.
“Ozodlik” jurnalisti ilə danışan 21 saylı qadın koloniyasının əməkdaşının sözlərinə görə, Gülnarə Kərimova müəssisənin rəhbərliyi üçün əsl başağrısına çevrilib.
Qadın koloniyasının əməkdaşının sözlərinə görə, Gülnarə Kərimovanın yaxınları ilə görüşmək üçün xüsusi imtiyazı yoxdur. Bəzi hallarda qohumları ilə görüşə qanunla icazə veriləndə heç kim onu görməyə gəlmir.
“Bir tərəfdən, biz əməliyyatçılara tapşırılır ki, onunla rəftar edərkən diqqətli olaq. Digər tərəfdən, bizə deyirlər ki, ona heç bir xüsusi münasibət göstərməyin”, – Zəngiatadakı qadın koloniyasının əməkdaşı deyib.
G.Kərimova sui-qəsd, qəsb, mənimsəmə və soyğunçuluq, çirkli pulların yuyulması və digər cinayətlərdə ittiham olunub. Onun xaricdəki varidatının böyük hissəsinin üzərinə həbs qoyulub.
Gülnarə Kərimovanın dövlətin və vətəndaşların mənafeyinə vurduğu zərərin ümumi məbləği 1 milyard 651,8 milyon ABŞ dolları təşkil edir.Musavat.com
