Çeçenistan rəhbəri Ramzan Kadırovun səhhətində ciddi problemlərin yarandığı və bu səbəbdən onun respublikanın idarə olunmasında iştirakının əhəmiyyətli dərəcədə azaldığı bildirilir. Əsas səlahiyyətlərin isə hökumət rəhbərliyinə və Kadırovun yaxın çevrəsinə verildiyi qeyd olunur. Ulusal.az xəbər verir ki, bu barədə Unian məlumat yayıb.
Nəşr qeyd edir ki, Rusiya və Çeçenistan mətbuatı Kadırovun sağlamlıq durumunun pisləşməsi ilə bağlı daha çox məlumat yaymağa başlayıb. Jurnalist İrina Mişina bildirib ki, son yayılan videolarda Kadırov narahat görünür, nəzərəçarpacaq dərəcədə arıqlayıb və hərəkətlərində çətinliklər var. Mənbələr Kadırovun ciddi böyrək problemləri ilə üzləşdiyini təsdiqləyir və ona nefrostomiya — sidik drenajı üçün xüsusi boru quraşdırıldığı bildirilir.
Bu səbəbdən Kadırovun Çeçenistanın idarə olunmasında iştirakı praktik olaraq dayandırılıb. Jurnalistin sözlərinə görə, əsas səlahiyyətlər hökumət başçısı Maqomed Daudova ötürülüb, təhlükəsizlik qüvvələrinə nəzarət isə ehtimal ki, Kadırovun oğlu Adamın əlində cəmləşəcək.
Avqustun əvvəlində yerli televiziya Kadırovun Qroznıda “Putin” mikrorayonunun tikintisini yoxlayarkən yavaş və narahat hərəkət etdiyini göstərib. Eyni narahatlıq sentyabr ayında onun bir təhsil mərkəzinə səfəri zamanı da müşahidə olunub; operatorlar görüntüləri uzaqdan və qısa kadrlarla məhdudlaşdırıblar.
Nəşr onu da vurğulayır ki, nefrostomiya ağır böyrək xəstəliklərində xəstələrin uzun müddət yaşaması üçün tətbiq olunan bir prosedurdur, lakin bu, fiziki aktivliyin azalmasını və ehtiyatlı həyat tərzinin tələb olunmasını zəruri edir.
