Ermənistanın KTMT büdcəsinə töhfə verməkdən imtina etməsini şərh edən Rusiya Xarici İşlər Nazirliyi bildirib ki, İrəvanın büdcəyə ödəmələr üzrə borcları əvvəllər də olub.
Ulusal.az xəbər verir ki, bu barədə “RİA Novosti” məlumat yayıb.
Daha əvvəl Ermənistan Xarici İşlər Nazirliyinin mətbuat katibi Ani Badalyan bəyan edib ki, İrəvan KTMT Kollektiv Təhlükəsizlik Şurasının 23 noyabr 2023-cü il tarixli “KTMT-nin 2024-cü il büdcəsi haqqında” qərarına qoşulmaqdan və təşkilatın bu sənəddə nəzərdə tutulmuş fəaliyyətinin maliyyələşdirilməsində iştirakdan çəkinəcək.
Vəziyyəti agentliyə şərh edən Rusiya Xarici İşlər Nazirliyi qeyd edib ki, “bu, İrəvanın iştirakının “dondurulması” və KTMT-nin maliyyələşdirilməsinin dayandırılması ilə bağlı ilk bəyanatı deyil”.
“Məsələnin mahiyyətinə gəlincə, təşkilatın büdcəsinə, o cümlədən Ermənistandan ödənişlərdə gecikmələr əvvəllər də olub”, – XİN-dən bildiriblər.
Onlar qeyd ediblər ki, “o dövrdə mövcud ehtiyatlardan işlək şəkildə istifadə etməklə Təşkilatın fəaliyyətinin maliyyələşdirilməsi problemləri həll edilib və “borclular” sonradan borclarını ödəyiblər”.
“Ermənistan Respublikasının 2024-cü il üçün pay töhfəsi 53,22 milyon rubl məbləğində müəyyən edilib”, – departamentdən bildirilib.
