Azərbaycan Respublikasının Prezidenti İlham Əliyev sentyabrın 14-də Xocavənd rayonunun Sos kəndinə səfər edib.
Dövlət başçısına kənddə görülmüş işlər barədə məlumat verilib.
Sos kəndi 2023-cü ildə Azərbaycan ordusunun keçirdiyi antiterror əməliyyatı nəticəsində ölkəmizin nəzarətinə keçib. Kənddə artıq elektrik və qaz xətləri bərpa olunub, subartezian quyuları qazılıb, iki transformator quraşdırılıb, sayğacların quraşdırılmasına başlanılıb, 3 su anbarı təmir edilib, təxminən 5 km uzunluğunda qaz kəməri çəkilib.
Sos kəndində mövcud olan 259 fərdi evdən 70-i yararsız, 189-u isə qismən yararlı vəziyyətdədir. Hazırda 10 ev istifadəyə tam hazırdır. Bu ilin sonunadək daha 75 evin sakinlərə təhvil verilməsi nəzərdə tutulur. 2026-cı ildə isə əlavə 104 evin bərpası planlaşdırılır. Artıq 10 ailə (46 nəfər) doğma yurda qayıdıb.
Prezident İlham Əliyev Sos kəndinə köçən Hamlet Gülməmmədovun evində olub.
Dövlət başçısı həmçinin sentyabrın 14-də Xocavənd rayonunun Qırmızı Bazar qəsəbəsinə də baş çəkib.
