Bakı Ağır Cinayətlər Məhkəməsində sabiq deputat Hüseyn Abdullayevin cinayət işi üzrə məhkəmə prosesi başlayıb.
Hakim Azər Tağıyevin sədrliyi ilə keçirilən prosesdə təqsirləndirilən şəxsin anket məlumatları dəqiqləşdirilib. Məhkəmənin hazırlıq iclasında Hüseyn Abdullayevin vəkilləri cinayət işinə xitam verilməsi, prosesdə vəkillərinin yanında əyləşməsi, ev dustaqlığına buraxılması da daxil, müxtəlif vəsatətlər qaldırıblar.
Bununla belə, müdafiəçilərin hamısı onun sağlıq durumuna daha çox diqqət çəkiblər. Vəkillər vurğulayıblar ki, Hüseyn Abdullayevin həyatı təhlükədədir. Onlar müvəkkillərinin öncədən də sağlamlığında problemlər olduğunu, onun yüksək təzyiqdən əziyyət çəkdiyini, bu üzdən dərmansız keçinmədiyini bildiriblər.
Deyiblər ki, Hüseyn Abdullayevə təcridxanada adını bilmədikləri dərman verilib. Bundan sonra onun vəziyyəti kəskin pisləşib:
“Ürəyində ağrı, boğulma yaranıb, deyir, sinəm yanırdı. Vəziyyəti o qədər pisləşib ki, vəkillərlə görüşə əlil arabasında gətirib-aparırlar. Məhkəməyə zorla gətirilib, adam gəzə bilmir”.
Vəkil Şəhla Hümbətova qeyd edib ki, Penitensiar Xidmətin Müalicə Müəssisəsi şöbə rəisinin Hüseyn Abdullayev ilə bağlı rəy verib. Həmin rəydən Hüseyn Abdullayevin infarkt keçirdiyi, onun ürəyində açıq şəkildə çapıq yarandığı bilinib. Vəkil müvəkkilinin həyatının təhlükədə olduğunu vurğulayıb. Digər vəkillər də ailəsinin vəsaiti hesabına sabiq deputatın tibb müəssisəsində müayinəsinə imkan yaradılmasını istəyiblər. Səhhətindəki problemlər üzündən Hüseyn Abdullayevin məhkəməyə gətirilməməsi, məhkəməyə videokonfrans vasitəsilə qatılması barədə də vəsatət qaldırıblar.
Vəkillərin digər vəsatətləri sabiq deputatın haqqında cinayət işinə xitam verilməsinə, yaxud onun ev dustaqlığına buraxılmasına dair olub. Daha sonra təqsirləndirilən şəxsin vəkilləri vəsatət verərək bildiriblər ki, Hüseyn Abdullayevin ailəsinin hesabına şəxsi həkimlə təmin olunmasını və özəl xəstəxanaların birində müalicə olunmasını istəyiblər. Bundan başqa müdafiəçilər təqsirləndirilən şəxsin səhhəti ilə əlaqədar məhkəmə iclasının videokonfrans vasitəsi ilə, və yaxud istintaq təcridxanasında keçirilməsi ilə bağlı da vəsatət təqdim ediblər. Vəkillər müvəkkillərinin səhhətindəki problemlərlə əlaqədar ev dustaqlığına buraxılmasını da istəyiblər.
Hakimlər Hüseyn Abdullayevi ev dustaqlığına buraxmaqdan imtina etsələr də, onun Penitensiar Xidmətin Müalicə Müəssisəsinə köçürülməsinə, məhkəmə iclaslarına videokonfrans vasitəsilə qoşulmasına razılıq veriblər.
Məhkəmə baxışı avqustun 22-nə təyin olunub.
Xatırladaq ki, 2019-cu ilin oktyabr ayında Hüseyn Abdullayev 6 il müddətinə azadlıqdan məhrum edilib. Sabiq deputata hədə-qorxu ilə tələb etmə, qanunsuz sahibkarlıq, cinayət yolu ilə əldə edilmiş pul vəsaitlərini və ya digər əmlakı leqallaşdırma və digər əməllərlə bağlı ittiham verilib. Həbs müddətinin bitməsinə az qalmış onun barəsində yenidən cinayət işi başlanılıb. İstintaqla Hüseyn Abdullayevin bilə-bilə cinayət yolu ilə əldə etdiyi əmlakın həqiqi mənbəyini gizlətmək məqsədi ilə özünün və ailə üzvlərinin adlarına ölkəmizdə fəaliyyət göstərən banklarda açılmış 7 bank hesabı vasitəsi ilə ümumilikdə 5.5 milyon manatdan artıq pul vəsaitini müxtəlif fiziki və hüquqi şəxslərin Azərbaycan Respublikası və xarici ölkələrdəki bank hesablarına köçürməklə, konvertasiya əməliyyatlarını həyata keçirməklə, habelə qanunsuz əqdlər bağlamaqla yaxın qohumunun adına Azərbaycan Respublikası ərazisində daşınmaz əmlaklar alaraq həmin məbləğdə pul vəsaitini leqallaşdırmasına əsaslı şübhələr müəyyən edilib.Musavat.com
