Ermənistanın iqtisadiyyat naziri Gevorq Papoyan Azərbaycandan gətirilən buğdanın keyfiyyəti ilə bağlı yaranan müzakirələrə münasibət bildirib.
Ulusal.az xəbər verir ki, nazir bu barədə özünün “Facebook” səhifəsində yazıb.
O bildirib ki, bəzi sosial şəbəkə istifadəçilərinin iddialarına baxmayaraq, Azərbaycandan idxal edilən 3-cü sort rus buğdası artıq una və çörəyə çevrilib və ölkədə hər kəs həmin çörəyi istehlak edib.
“Hamımız o çörəyi yedik və gördüyünüz kimi heç kim zəhərlənməyib. 1000 ton buğda bizim gündəlik istehlakımızla müqayisədə çox az miqdardır”, – Papoyan qeyd edib.
Bundan əvvəl sosial şəbəkə istifadəçilərindən biri Papoyandan Azərbaycandan gətirilən buğdanın təhlükəsizliyinə kim zəmanət verdiyini soruşmuşdu. Nazir isə cavabında bildirmişdi ki, bu buğdadan hazırlanan çörəyi ilk o yeyəcək.
