image-2000x150
image-1backend

Hacı Mövsüm Amerikaya qaçmaq istəyib? – Video

image-728x90

Dövlət qeydiyyatı olmayan Azərbaycan İslam Partiyasının sabiq sədri Mövsüm Səmədov barədə qalmaqallı məlumat yayılıb.

Ulusal.az “haqqin.az”a istinadən xəbər verir ki, yanvarın 23-ü ABŞ-də Texas Azadlıq Koalisiyasının mühafizəkar lobbi qrupunun prezidenti Sarah Cessica Fields öz X sosial şəbəkə hesabında Meksika ilə sərhədi qanunsuz keçən bir şəxsin videosunu yayıb.

Sözügedən kadrlarda görünən şəxs deyir: “Sən mənim kim olduğumu biləcək qədər ağıllı deyilsən. Ancaq tezliklə bunu təkcə siz yox, hamı öyrənəcək”.

Fields videonu şərh edərək öz paylaşımında bildirib: “İndi biz bu immiqrantın kim olduğunu bilirik. Bu şəxs Mövsüm Səmədovdur. İslam Partiyasının sədri Səmədov hökuməti devirməyə cəhddə ittiham olunaraq 12 il müddətinə azadlıqdan məhrum edilib və 2023-cü il yanvarın 19-da azadlığa çıxıb”. Onun video ilə müşayiət olunan bu paylaşımı milyonlarla baxış toplayıb.

Fieldsin yaydığı məlumat sosial şəbəkələrdə populyarlaşdıqdan sonra “Amerikanın səsi” və “Azadlıq” radiosunun Azərbaycan xidmətinin müxbirləri Mövsüm Səmədovla əlaqə saxlayıblar. Azərbaycan islamçılarının keçmiş lideri barəsində yayılan bu məlumatı təkzib edərək, onu yayanları saxtakarlıqda ittiham edib. Hazırda Azərbaycanda olduğunu bildirən Səmədov bildirib ki, Meksika-Amerika sərhəddinə gedə bilməzdi, çünki onun ölkədən çıxışı qadağan edilib. Bununla yanaşı, Səmədov videoda yer alan şəxsin ona bənzəmədiyini vurulayıb: “Diqqətlə baxın, eynək istisna olmaqla, oxşarlıq çox azdır”.

Məsələdən bir neçə gün sonra Fields yenidən paylaşım edərək Meksika-ABŞ sərhədini qanunsuz keçən miqrantın Mövsüm Səmədov olmadığını deyib: “İndi biz bu qanunsuz miqrantın kim olduğunu bilirik. Videodakı şəxs Mövsüm Səmədov deyil”.

Amerika mediası müəyyən edib ki, Sara Cessika Fields tərəfindən paylaşılan video, ABŞ-nin cənub sərhədi boyunca səyahət edən, sərhədi qanunsuz keçən miqrantların fotolarını çəkən “1st responders Media” şirkəti tərəfindən lentə alınıb. Fieldsin feyk paylaşımından bir gün sonra, daha dəqiq desək, yanvarın 24-ü Rayne adlı “X” sosial şəbəkə istifadəçisi bu xəbəri ilk dəfə təkzib edən şəxs olub. Ancaq heç kəs amerikalı bu şəxsin təkzibinin etibarlılığına əhəmiyyət verməyib.

Maraqlıdır ki, Fieldsin həmin paylaşımı ABŞ-nin cənub sərhədlərinin qorunması ilə əlaqədar respublikaçılar və demokratlar arasında kəskin mübahisələrin getdiyi bir vaxtda ortaya çıxıb. Belə ki, ABŞ Gömrük və Sərhəd Mühafizəsi 2020-ci il yanvarın 1-dən 2023-cü il sentyabrın 30-dək 8,4 milyon miqrantın Meksikadan qeyri-qanuni yolla ölkəyə daxil olmağa cəhd etdiyini açıqlayıb. ABŞ-nin hazırkı Co Bayden administrasiyasının əsas rəqibi, prezidentliyə namizəd Donald Trampın sözlərinə görə, o, qalib gələrsə, Meksika ilə sərhədi dərhal bağlayacaq və ölkədən milyonlarla qanunsuz immiqrantı deportasiya edəcək.

X sosial şəbəkəsinin Amerika seqmentində Azərbaycanla bağlı saxta xəbərlərin yayılması ilk dəfə deyil. Keçən ilin payızında HƏMAS-ın İsrailə hücumundan sonra radikal islamçılar X platformasında “əsir götürülmüş İsrail generallarının” videosunu yayımladılar. Amma reallıqda bu videoda Azərbaycanın hüquq-mühafizə orqanları tərəfindən Qarabağda həbs edilən erməni separatçılarının liderləri təsvir edilmişdi.

Xatırladaq ki, M.Səmədov 2023-cü ilin yanvarında həbsdən buraxılıb. 2011-ci ilin yanvarında tutulan Mövsüm Səmədov hakimiyyəti zorla ələ keçirmək cəhdi və başqa ağır cinayətlərdə təqsirli bilinərək 12 il müddətinə azadlıqdan məhrum olunmuşdu. 2019-cu il dekabrın 12-də Avropa İnsan Hüquqları Məhkəməsi Mövsüm Səmədovun şikayəti üzrə qərarını elan edərək ona Avropa İnsan Hüquqları Konvensiyası ilə verilmiş azadlıq və toxunulmazlıq, ədalətli məhkəmə araşdırması hüquqlarının pozulduğunu bildirib, Azərbaycan dövlətinə 4 min avro təzminat cəzası kəsib. 1965-ci il təvəllüdlü Mövsüm Səmədov Bakıda ali tibb təhsili, İranda isə dini təhsil alıb.

image-728x90

  • whatsapp
  • messenger
  • telegram
  • vkontakte
  • odnoklassniki
image-728x90