Hollandiyada sosial ev kirayələrinin iki il müddətinə dondurulması mübahisələrə səbəb olub. Təxminən 400 min evin əhatə dairəsi xaricində qala biləcəyi ifadə edilir.
Ulusal.az xəbər verir ki,ötən həftə açıqlanan büdcə planına daxil edilən bu maddə sosial evlərdə yaşayan kirayəçilər üçün müsbət hal kimi qiymətləndirilib. Lakin icranın təfərrüatlarında ciddi qeyri-müəyyənliklər var. Xüsusilə, sosial mənzil statusuna malik kirayəçilərin özəl sektordan kənarda qalması narahatlıq yaradıb.
Seçki dövründə bütün icarə haqlarına 20% endirim vəd edən PVV indi müxalifət partiyalarının sərt tənqidinə tuş gələrək, yalnız məhdud bir seqmenti əhatə edən addım atıb.
PVV millət vəkili Jeremy Mooiman bildirib ki: “PVV olaraq biz bütün sosial kirayələrin dondurulmasının tərəfdarıyıq”. Lakin o, özəl sektorda yaşayan kirayəçilər üçün heç bir konkret təminat verə bilməyib.
Nazir Mona Keijzer parlamentdə keçirilən müzakirələrdə koalisiya sazişini tənzimləməyə çevirərək praktiki fəaliyyətə keçirəcəklərini bildirdi. Bununla belə, o, özəl sektorun ev sahiblərinin bu sahəyə daxil edilməsinin ciddi maliyyə yükü və inzibati çətinliklər yaradacağını vurğulayıb.
“Bunu həyata keçirmək demək olar ki, qeyri-mümkün olardı” dedi Keijzer, bütün fərdi ev sahiblərinin kompensasiya edilməli olacağını və bunun hüquqi problemlərə səbəb ola biləcəyini söylədi.
