Türkiyə prezidenti Rəcəb Tayyib Ərdoğan və Suriya lideri Bəşər Əsəd üçüncü ölkədə danışıqlar apara bilər, Ankara Dəməşqin Suriya müxalifəti ilə dialoq aparmasını istəyir.
Ulusal.az xəbər verir ki, bunu Türkiyənin xarici işlər naziri Hakan Fidan deyib.
“Ərdoğan və Əsəd arasında 10 ildən artıq müddətdə ilk görüş avqustda sərhəd-keçid məntəqəsində baş tuta bilər”, – Türkiyə mətbuatı daha əvvəl məlumat yaymışdı.
İddia edilirdi ki, Rusiya Xarici Kəşfiyyat Xidmətinin rəhbəri Sergey Narışkin ötən həftə Ankarada türkiyəli həmkarı İbrahim Kalınla Türkiyə və Suriya liderlərinin görüşünün tarixi və yerini müzakirə edib.
Fidan “Sabah” qəzetinə müsahibəsində “Görüş baş tutsa, üçüncü ölkədə baş tutacaq, lakin hələlik konkret məlumat yoxdur” deyib.
Onun sözlərinə görə, Rusiya tərəfi görüşdə İran nümayəndələrinin iştirakının vacibliyini bəyan edir, lakin Ankara üçün prioritet görüşün özüdür.
Fidan qeyd edib ki, Suriya rəsmiləri ilə görüşün yeri və tarixi ilə bağlı dialoq davam edir, lakin hələlik dəqiq tarixlər yoxdur. Nazir qeyd edib ki, eyni zamanda, Suriya tərəfi heç bir ilkin şərt olmadan görüşə hazırdır.
Rusiya prezidentinin mətbuat katibi Dmitri Peskov çərşənbə axşamı Moskvanın Ərdoğan və Əsəd arasında görüşə hazırlaşıb-hazırlanmaması sualını cavablandırarkən bildirib ki, digər ölkələr kimi Rusiya da Türkiyə ilə Suriya arasında münasibətlərin yaxşılaşdırılmasında maraqlıdır.
