Azərbaycan seysmik zonada yerləşir. Tarixən də ölkədə dağıdıcı yeraltı təkanlar baş verib.
Dağıdıcı zəlzələlər daha çox fəsad yaratmasın deyə binalar, yollar, körpülər zəlzələyə dayanıqlı şəkildə inşa edilir.
Azərbaycanda çoxmərtəbəli yaşayış binalarının zəlzələyə dayanıqlılığını yoxlamaq üçün cihazlar yerləşdiriləcək. Bu barədə Azərbaycan Memarlıq və İnşaat Universitetinin Zəlzələ Araşdırmaları Mərkəzi məlumat yayıb.
Bəs bu işlərə nə zaman və ilk olaraq hansı ərazilərdən başlanılacaq?
Universitetin Zəlzələ Elmi Tədqiqat Mərkəzinin direktoru professor Azər Qasımzadə açıqlamasında layihənin tətbiqi üçün işlərə başlanıldığını və yaxın zamanda aidiyyəti qurumlarla görüşlər təşkil olunacağını deyib.
Professor bildirib ki, tikililərin layihələndirməsini və nəzarətini müstəqil qurumlar həyata keçirməlidir:
“Layihələndirilmiş binaların tikintisində layihəyə uyğunluğa nəzarət edən orqanların müstəqil fəaliyyət göstərməsi zəruridir. Bu yanaşma tikinti prosesində keyfiyyətin daha da yüksək səviyyədə qorunmasını təmin edəcək. Eyni zamanda, əlaqəli tikinti normalarının hər beş ildən bir yenilənməsi zəlzələlərdən sonra əldə edilən elmi biliklərin və texnologiyaların tətbiqinə imkan verəcək.”
Direktor zəlzələyə qarşı dayanıqlı tikililər üçün yeni texnologiyanın tətbiq edildiyini qeyd edib. Bizim.Media
