Beynəlxalq İnsan Haqları Təşkilatı (FIDH) və onun tərəfdaşları Haaqadakı Beynəlxalq Cinayət Məhkəməsinin (ICC) prokuroruna məktubla müraciət edərək, “altı rus təbliğatçısı”nın həbsinə order verilməsini istəyib.
Ulusal.az xəbər verir ki, bu barədə “Meduza” qurumun press-relizinə istinadən məlumat yayıb.
Hüquq müdafiəçiləri teleaparıcı Vladimir Solovyovun, RT telekanalının baş redaktoru Marqarita Simonyanın, “Rossiya Seqodnya” media qrupunun rəhbəri Dmitri Kiselyovun, teleaparıcı Sergey Mardanın, həmçinin Rusiya Federasiyası Təhlükəsizlik Şurasının sədr müavini Dmitri Medvedevin həbsini tələb ediblər.
Onların hamısı, bəyanat müəlliflərinin fikrincə, Ukraynada dinc əhaliyə qarşı nifrətin yayılması kampaniyasında iştirak edərək, “Rusiyanın hərbi cinayətlərinə” töhfə verirlər. Hüquq müdafiəçiləri deyirlər ki, bu hərəkətləri insanlığa qarşı cinayət kimi qiymətləndirmək olar.
FIDH hesab edir ki, ukraynalıların nifrət nitqi ilə təqib edilməsinə görə Rusiya prezidentinin aparat rəhbərinin birinci müavini, Rusiya televiziyasında dövlət təbliğatına cavabdeh olan Aleksey Qromov da məsuliyyət daşıyır.
Hüquq müdafiəçiləri çağırışları çərçivəsində adıçəkilən şəxslərin 24 fevral 2022-ci il və 24 fevral 2024-cü il tarixləri arasında verdiyi ifadələrdən ibarət iki mindən çox videonu təhlil ediblər. Ümumilikdə, FIDH və tərəfdaşları ukraynalılara qarşı nifrət nitqi hesab edilən 300-dən çox bəyanat müəyyən ediblər. FIDH araşdırmasının nəticələri BCM-nin prokurorluğuna göndərilib.
