Bakının mərkəzində – Fəvvarələr Meydanında yerləşən və yerli əhəmiyyətli memarlıq abidəsi kimi tanınan dördmərtəbəli binada sakinlər arasında narazılıq yaranıb. Səbəb – hər gün bir neçə ailənin istifadə etdiyi pilləkənlərin qəzalı vəziyyətdə olmasıdır.
Təmir işləri gözlənilmədən başlayıb: daş pilləkənlər dəyişdirilib, tarixi məhəccərlər çıxarılaraq həyətə yığılıb. Lakin memarlıq abidəsinə müdaxilə müəyyən icazələr tələb etdiyi üçün proses yarımçıq dayandırılıb – bu isə işlərin daha da sürətlə aparılmasına səbəb olub.
Artıq bir aya yaxındır ki, sakinlər məhəccərsiz, qəzalı pilləkənlərdən ehtiyatla istifadə etməyə məcburdur. Hər addımda təhlükə hiss olunur.
Sakin Gülarə Vəliyeva bildirir ki, problem çoxdan mövcuddur:
“Pilləkənlərdən daşlar qopub düşürdü, məhəccərlər yellənirdi. Təmir başladı, amma bir qonşunun şikayətindən sonra hər şey dayandı. Qonşum uşağı ilə aşağı düşəndə az qala yıxılırdı. Anamın 88 yaşı var, artıq evdən çıxa bilmir.”
Binada lift olsa da, yaşlı sakinlərin sözlərinə görə, əvvəllər hamı üçün əlçatan olan lift, indi yalnız dördüncü mərtəbədə yaşayan bir ailənin istifadəsindədir.
Üçüncü mərtəbədə otel yerləşir. Girişdəki lövhə də bunu təsdiqləyir. Otelin və bəzi mənzillərin ayrıca çıxışları mövcuddur. Binanın fasadında dəyişikliklər nəzərə çarpır: aşağı və yuxarı mərtəbələrdə uzantılar, eyvanların dəyişdirilmiş forması artıq binanın ilkin memarlıq görünüşünü pozub.
Haqqin.az müxbirləri binada bir neçə qapını döysələr də, sakinlərin əksəriyyəti danışmaqdan imtina edib. Yalnız bir nəfər bildirib ki, ev artıq ilkin görkəmini itirib və təcili bərpaya ehtiyac var.
Bakının tarixi mərkəzində bu cür problemlər çoxdur. Yerli sakinlər qeyd edirlər ki, bir çox memarlıq abidələrində icazəsiz işlər aparılır və onların müraciətləri cavabsız qalır. Haqqin.az daha öncə də belə hallarla bağlı məlumat vermişdi.
Səbail Rayon İcra Hakimiyyətindən bildirilib ki, Hacı Zeynalabdin Tağıyev küçəsi 16–18 ünvanında aparılan təmir işləri müvəqqəti dayandırılsa da, podratçıya məlumat verilib və yaxın zamanda işlərin davam etdirilməsi nəzərdə tutulur. Sakinlərə də bu barədə məlumat verilib.
Dövlət rəsmiləri isə bildiriblər ki, üçüncü mərtəbədə yerləşən otel liftdən istifadə etsə də, müvafiq rüsumları ödəməyib. Artıq iki ildən çoxdur ki, “Lifttəmir” mütəxəssisləri nasazlıq aşkar edərək, liftdən istifadəyə məhdudiyyət qoyublar. Sakinlərin liftdən yalnız bir neçə nəfərin istifadə etməsi ilə bağlı şikayətləri isə hələ də cavabsız qalıb.
Mədəniyyət Nazirliyi yanında Mədəni İrsin Qorunması, İnkişafı və Bərpası üzrə Dövlət Xidməti bildirir ki, həmin ünvanda qanunsuz təmir işləri aparıldığı müəyyən edilib. Mütəxəssislər baxış zamanı birinci mərtəbədə tarixi məhəccərlərin söküldüyünü aşkarlayıblar.
Razılaşdırılmamış işlər dərhal dayandırılıb. Mülkiyyətçiyə xəbərdarlıq olunub və ona bildirilib ki, abidələrin mühafizəsi haqqında qanunvericiliyin pozulması cinayət, inzibati və mülki məsuliyyət yaradır. Binanın ilkin memarlıq görkəminin bərpası ilə bağlı göstəriş verilib.
Lakin hələ də aşağıdakı məsələlərlə bağlı suallar cavabsız qalır:
icazəsiz tikinti və genişləndirmələr,
reklam lövhələrinin quraşdırılması,
liftin istifadəsi və təmiri,
pilləkənlərin təhlükəsizliyinin təmin olunması,
zədələnmiş daş elementlərin taleyi.
Nəticədə, Bakının mərkəzində – Fəvvarələr Meydanında yerləşən bu bina hazırda təhlükəli vəziyyətdədir. Sakinlər hər gün məhəccərsiz pilləkənlərdən ehtiyatla enib-qalxır, hər addımda yıxılmaq təhlükəsi ilə üz-üzə qalırlar.haqqin.az
