Bu gün futbol üzrə Azərbaycan milli komandası 2026-cı il dünya çempionatının seçmə mərhələsi çərçivəsində növbəti oyununu keçirəcək. Rəqib isə bölgənin güclü kollektivlərindən biri olan Ukrayna millisidir.
Görüş Tofiq Bəhramov adına Respublika stadionunda, saat 20:00-da başlayacaq.
İlk turda İslandiya yığmasına 0:5 hesabı ilə acı məğlubiyyətdən sonra Azərbaycan millisində baş məşqçi dəyişikliyi baş verib. Portuqaliyalı Fernando Santos komandadan ayrılıb. Hazırda bu vəzifə müvəqqəti olaraq Azərbaycanın gənclərdən ibarət milli komandasının və “Şamaxı” klubunun baş məşqçisi Ayxan Abbasova həvalə olunub.
Lakin istər ictimaiyyət, istərsə də futbol dairələri əsas sualla qarşı-qarşıyadır: Azərbaycan millisinin baş məşqçisi kim olmalıdır?
İlk ağıla gələn ad təbii ki, ölkə futbolunun simalarından biri – Qurban Qurbanovdur. O, 2018-ci ildə də Azərbaycan millisinə rəhbərlik edib və həmin dövr bir çox baxımdan uğurlu sayılıb. Lakin bir məsələ var: müasir futbolda eyni anda həm milli komandanı, həm də Çempionlar Liqasının əsas mərhələsində çıxış edən bir klubu (bu halda “Qarabağ”ı) idarə etmək real görünmür.
Qurbanov artıq bu təcrübəni yaşayıb. Yeddi il əvvəl onun rəhbərlik etdiyi milli və “Qarabağ” cəmi üç ay ərzində 12 beynəlxalq oyun keçirmişdi. Üstəlik, bu qədər sıx qrafikdə uğur qazanmaq çətin idi və “Qarabağ” həmin mövsüm avrokuboklarda zəif nəticələr göstərmişdi.
Qurbanovun “Qarabağ”dan ayrılaraq milliyə keçməsi isə başqa bir riskdir. Belə bir addım həm “Qarabağ”ın avrokuboklardakı mövqeyini zəiflədə bilər, həm də milli komandaya ciddi bir irəliləyiş gətirməyə bilər.
Yəni Qurban Qurbanovun hazırda milli komandaya namizəd kimi göstərilməsi nə “Qarabağ” üçün, nə də Azərbaycan futbolu üçün optimal yol deyil.
Bu şəraitdə ən real və məntiqli namizəd Rəşad Sadıxov görünür. Hazırda “Zirə” klubuna başçılıq edən sabiq milli kapitan, həm oyunçu, həm də məşqçi kimi yerli futbol mühitində yüksək nüfuza malikdir.
Sadıxovun rəhbərliyi altında “Zirə” son mövsümlərdə stabil çıxışı və taktiki intizamı ilə fərqlənib. O, eyni zamanda milli komandada bir neçə baş məşqçinin dövründə uzun illər kapitanlıq edib və millinin daxilində nüfuz sahibidir.
Bu gün Azərbaycan yığmasının futbolçuları onun liderliyini qəbul edəcək və komanda daxilində intizam baxımından ciddi dönüş yarana bilər.
Bununla belə, Rəşad Sadıxovun yaxın perspektivdə yığmaya rəhbərlik etməsi ilə bağlı bir ehtiyatlı yanaşma da mövcuddur. Qarşıda Fransa ilə oyunlar var və belə güclü rəqibə qarşı mümkün ağır məğlubiyyətlər məşqçinin reputasiyasına zərər vura bilər. Bu səbəbdən, Sadıxovun özü də milliyə gələn ildən rəhbərlik etməyi üstün tuta bilər.
Azərbaycan millisində baş məşqçi məsələsi açıq olaraq qalır. Qurban Qurbanovun mövcud şərtlərlə yığmaya qayıtması real görünmür. Ən məntiqli seçim Rəşad Sadıxovdur. O, emosional və praktiki baxımdan bu vəzifəyə ən uyğun namizəddir. Lakin AFFA rəhbərliyi qərar verərkən qarşıdakı riskləri və komandanın gələcək strategiyasını düzgün qiymətləndirməlidir.
