Ötən ilin iyun ayında azadlığa buraxılan Şəmkir rayonunda yerləşən “Qala” ailəvi istirahət mərkəzinin rəhbəri Tural Allahverdi oğlu Zeynalov 3 ay sonra prokurorun protesti əsasında həbs edilib.
Bu barədə “Unikal”a Tural Zeynalovun atası məlumat verib:
“Oğlum 2023-cü ilin iyun ayında Penitensiar xidmətin 17 saylı cəzaçəkmə müəssisəsindən azadlığa buraxılsa da, sentyabr ayında Bakı Apellyasiya Məhkəməsi tərəfindən yenidən həbs edilib və 14 saylı cəzaçəkmə müəssisəsinə göndərilib. Martın 18-də cəza müddəti tam bitir”.
Qeyd edək ki, Tural Zeynalov apellyasiya məhkəməsinin qərarından kassasiya şikayəti verib və yanvar ayının 25-də Ali Məhkəmənin hakimi İlkin Rəcəbovun sədrliyi ilə məhkəmə prosesi keçiriləcək.
Xatırladaq ki, Tural Zeynalov 2021-ci il iyul ayının 23-də Şəmkir rayonunda sahibi olduğu “Qala” restoranında polisə müqavimət göstərdiyi üçün həbs edilib və Cinayət Məcəlləsinin 315-ci (hakimiyyət nümayəndəsinə qarşı müqavimət göstərmə və ya zor tətbiq etmə) maddəsi ilə təqsirli bilinərək 2 il 6 ay müddətinə azadlıqdan məhrum edilib.
Qeyd edək ki, Tural Zeynalov 2020-ci ildə 99 saylı Şəmkir kənd seçki dairəsindən deputatlığa namizəd olub.
