Avropa enerji böhranının öhdəsindən gəlməyi bacardı, qazın qiyməti məqbul səviyyəyə – 400 dollara düşdü.
Ulusal.az xəbər verir ki, bunu analitik İqor Yuşkov “Lenta.ru”ya danışıb.
O, Aİ ölkələrinin hazırda iqtisadi böhranla üzləşdiyini, bunun sosial böhrana səbəb ola biləcəyini deyib:
“2021-ci ildən 2023-cü ilə qədər Avropada enerji böhranı olub. İndi qiymətlər stabilləşib və uzunmüddətli orta qiymətlərə çatıb. Təchizat kanallarının şaxələndirilməsi siyasəti isə bir çox cəhətdən regiona ziyan vurdu. Xüsusən də qaz kəmərlərinin normal çəkilməsinə icazə vermirdilər. Belə olsa idi “Şimal axını” çox erkən tikilə bilərdi. Onlar uzun müddət Rusiyanın Avropa qaz bazarındakı payının azalacağını xəyal edirdilər və belə də oldu”.
Analitik izah edib ki, boru kəməri qazının istehlakı həqiqətən də azalıb, lakin əvəzində mayeləşdirilmiş təbii qazın (LNG) istehlakının artması və bunun üçün Asiya bazarları ilə rəqabət aparmaq zərurəti kimi başqa problem yaranıb.
“Asiyada qiymətlər qalxdı və müvafiq olaraq bütün qaz daşıyıcıları ora yönəldi. Bu səbəbdən Avropa da qiymətləri qaldırmağa məcbur oldu. İndi onların Çinlə qlobal rəqabəti var, çünki diversifikasiya yalnız alıcı bazarında işləyirdi”, – Yuşkov qeyd edib.
O, vurğulayıb ki, Avropada baş verənləri enerji böhranı adlandırmaq olmaz. Əksinə, bu, ondan çıxış yoludur. Lakin bunun nəticəsi iqtisadi böhran oldu.
“Min kubmetr üçün 400 dollar aşağı qiymətdir, bazar stabilləşib. Amma istehlakın azalması səbəbindən, Rusiyanı əvəz etməyə heç kim gəlmədiyi üçün istehlakın həcmi sadəcə olaraq 1996-cı il səviyyəsinə düşüb”, – analitik xatırladıb.
Yuşkov deyib ki, sənayenin tənəzzülü enerji böhranının iqtisadi nəticələridir. Və bu, iş yerlərinin ixtisarına görə sosial böhrana səbəb ola bilər.
