ATƏT-in fəaliyyətdə olan sədri, Maltanın xarici işlər naziri Yan Borq İrəvanda erməni həmkarı Ararat Mirzoyanla keçirdiyi brifinqdə jurnalistlərin təxribatçı sualları ilə üzləşib.
Erməni jurnalistlər “Azərbaycanın ərazi iddiaları ilə çıxış etməsinə və Qərbi Azərbaycanı ATƏT platformasında bəyan etməsinə niyə icazə verildiyi” iddiasını ortaya atıblar.
Yan Borq cavabında deyib: “Malta ATƏT-in fəaliyyətdə olan sədri kimi şəffaf və dürüstdür. Biz Ermənistanı və Azərbaycanı hərtərəfli sülh sazişinin əldə edilməsi üçün dəstəkləyəcəyik”.
Yan Borq erməni jurnalistlərin Ermənistan və Azərbaycan arasında sərhədin delimitasiyası prosesini qiymətləndirmək tələbindən də imtina edib.
“Mən burada öz mövqeyimi ifadə etsəm, bu, prosesə kömək etməyəcək. Biz (ATƏT-red) prosesin bir hissəsi deyilik, bu ikitərəfli prosesdir”, – o deyib.
Jurnalistlərdə biri brifinqin keçirildiyi Ermənistan XİN binasının önündə etiraz aksiyası keçirən Qarabağdan qayıtmış ermənilərin “geri qayıtmaq” tələbi ilə bağlı məktubunu Borqa verib və “ATƏT Qarabağ məsələsini bağlayıbmı” sualını ünvanlayıb.
“Təşkilat oyunçular arasında proseslərə qarışa bilməz”, – ATƏT sədri erməni jurnalistləri susdurub.
Əslində bu sualların hər birinin rəsmi İrəvanın mətbəxində hazırlandığı aydın görünür. Ermənistan ATƏT sədrindən Qərbi Azərbaycan məsələsində Bakıya qarşı çıxmasını, sərhədin delimitasiyasında onların istədiyi prinsipləri (Alma-Ata bəyannaməsi-red) dəstəkləməsini və ermənilərin Qarabağa “qayıtması” məsələsində mövqe bildirməsini istəyir. Bunu da məhz jurnalistlərin sualları ilə dilə gətirir. ATƏT sədri Borq isə hər bir təxribatçı suala möhtəşəm cavabı ilə Ermənistanı yerində oturtdu.
