Avropa Şurası Parlament Assambleyası (AŞPA) Azərbaycana qarşı nümayiş etdirdiyi ikili standartlardan və ədalətsiz mövqedən əl çəkməlidir. Bu fikirləri Ulusal.az-a verdiyi açıqlamada politoloq Arzuman Muradlı bildirib. Politoloq qeyd edib ki, AŞPA, Azərbaycana qarşı ədalətli və obyektiv bir yanaşma sərgiləmədikdə, bu qurumla əməkdaşlıqdan danışmaq mümkün deyil.
Arzuman Muradlı vurğulayıb ki, AŞPA-ya üzv olduğu gündən etibarən Azərbaycan, üzərinə düşən bütün beynəlxalq öhdəlikləri yerinə yetirib. Ancaq, buna baxmayaraq, həm AŞPA, həm də digər beynəlxalq təşkilatlar Azərbaycana qarşı təzyiq və qaralama kampaniyalarına rəhbərlik ediblər. Politoloq, xüsusilə Ermənistanla münaqişə zamanı AŞPA-nın Azərbaycanın ərazi bütövlüyünü dəstəkləmədiyini, bu dövrdə beynəlxalq hüququn da pozulduğunu qeyd edib.
“Azərbaycanın ərazi bütövlüyünü dəstəkləyən BMT Təhlükəsizlik Şurasının qətnamələri və digər beynəlxalq sənədlər nəzərə alınmadı. Bununla yanaşı, erməni lobbisinin təsiri altında olan AŞPA, Azərbaycana qarşı qətnamələr qəbul etdi və beynəlxalq hüquq normalarını ayaq altına aldı. Bu da öz növbəsində Azərbaycanın hüquqlarına ciddi şəkildə zərbə vurdu”, – deyə Arzuman Muradlı bildirib.
Arzuman Muradlı, AŞPA-nın öz fəaliyyətində islahatlar aparmaması halında, Azərbaycanın bu qurumla əməkdaşlıq etməsinin mümkünsüz olduğunu da vurğulayıb. O, bu islahatların yalnız AŞPA-dan gələcək ilk addımlarla mümkün olacağına inandığını qeyd edib.
“Bu gün AŞPA-da təmsil olunan bəzi parlamentarilər korrupsiyaya bulaşıblar və onlar haqqında cinayət işləri açılıb. Bununla yanaşı, erməni lobbisi də Azərbaycanın 44 günlük Vətən müharibəsindəki qələbəsini həzm edə bilməyib. Məhz bu səbəbdən, AŞPA, əvvəllər mövcud olmayan problemləri qabartmağa və Azərbaycanın əleyhinə addımlar atmağa çalışır”, – deyə politoloq bildirib.
Arzuman Muradlı, xüsusən Qarabağda yaşamış ermənilərin geri qaytarılması məsələsinin AŞPA tərəfindən gündəmə gətirilməsini də tənqid edib. O, bu məsələnin erməni tərəfi tərəfindən belə qaldırılmadığını, lakin AŞPA-nın bunu təkrar gündəmə gətirməsinin, qurumun Azərbaycanın əleyhinə çıxış etməyə çalışmasının bir göstəricisi olduğunu vurğulayıb.
Politoloq, Cənubi Qafqazda dayanıqlı sülhün təmin edilməsi üçün üçüncü tərəflərin müdaxiləsinə son verilməsi lazım olduğunu da əlavə edib. Arzuman Muradlı qeyd edib ki, Azərbaycan və Ermənistan artıq vasitəçi olmadan münasibətlərini normallaşdırır və qarşılıqlı əməkdaşlıq edir.
“Hazırda Azərbaycan və Ermənistan, birbaşa danışıqlar apararaq, regionda sabitlik və əməkdaşlıq qurur. Bu münasibətlərdə Azərbaycan tərəfindən göstərilən xoşməramlı jestlər müsbət qarşılanır. Son dövrlərdə, Prezident İlham Əliyevin Qazaxıstan məhsullarının Azərbaycan üzərindən Ermənistana daşınması məsələsini gündəmə gətirməsi, ölkələr arasında əməkdaşlığın yeni mərhələyə qədəm qoyduğunu göstərir”, – deyə Arzuman Muradlı qeyd edib.
