ABŞ Rusiyanı Ukrayna ilə sülh danışıqlarına getməyə çağırıb və əks halda sərt sanksiyalar tətbiq ediləcəyi ilə hədələyib. Ulusal.az xəbər verir ki, bu barədə The Guardian məlumat yayıb.
Xəbərdə qeyd olunur ki, xəbərdarlıq avqustun 29-da BMT Təhlükəsizlik Şurasının fövqəladə iclasında səsləndirilib. İclas Rusiyanın avqustun 28-nə keçən gecə Ukraynaya endirdiyi və azı 20 nəfərin ölümü ilə nəticələnən kütləvi zərbələrdən sonra çağırılıb.
ABŞ-ın BMT-dəki müvəqqəti səfiri Con Kelli bildirib ki, Moskvanın hücumları onun “sülhə sadiqliyini şübhə altına alır”. O, Rusiyanı dərhal Ukraynaya qarşı hücumları dayandırmağa çağırıb.
Kelli həmçinin Rusiya prezidenti Vladimir Putinə Ukrayna lideri Vladimir Zelenski ilə görüşməyi təklif edib. O xəbərdarlıq edib ki, əgər müharibə davam edərsə, ABŞ Rusiyaya qarşı yeni, daha sərt sanksiyalar tətbiq edəcək.
Politico isə yazır ki, Moskva iqtisadiyyatına ən ağır zərbəni Avropa Birliyi deyil, məhz ABŞ vura bilər. Nəşrə görə, Rusiya ilə ticarət edən ölkələrə qarşı tətbiq ediləcək ikinci dərəcəli sanksiyalar Kremlin imkanlarını ciddi şəkildə məhdudlaşdıra bilər.
Məlumata əsasən, yalnız ABŞ-ın Rusiya neftinə görə Hindistana yüksək rüsumlar tətbiq etməsindən sonra Vladimir Putin ABŞ prezidenti Donald Trampla Alyaskada görüşməyə razılıq verib.
