ABŞ bu il BMT-nin İnsan Hüquqları Şurasına insan hüquqlarının qorunması ilə bağlı hər hansı hesabat təqdim etməyəcək. Ulusal.az xəbər verir ki, bu barədə Reuters agentliyi ABŞ Dövlət Departamentindəki məlumatlı mənbəyə istinadla xəbər yayıb.
Mənbənin bildirdiyinə görə, Vaşinqton BMT-nin Universal Dövri İcmal (UPR) mexanizmində iştirak etməyəcək və noyabr ayında təqdim etməli olduğu hesabatdan imtina edib. Həmin vaxt ABŞ da daxil olmaqla 13 ölkənin hesabatı nəzərdən keçirilməli idi.
Qeyd edək ki, Universal Dövri İcmal prosesi çərçivəsində BMT-yə üzv olan 193 dövlət hər 4,5-5 ildən bir insan hüquqlarının qorunması üzrə hesabat təqdim edir. Bu sənədlər digər dövlətlər tərəfindən qiymətləndirilir və müvafiq tövsiyələr verilir.
ABŞ rəsmisinin sözlərinə görə, bu qərar prezident Donald Trampın 4 fevral tarixli sərəncamı ilə BMT İnsan Hüquqları Şurasından rəsmi çıxış qərarı ilə bağlıdır. Rəsmilər hesab edirlər ki, icmal prosesində iştirak Şuranın mandatı və fəaliyyəti ilə dolayısı ilə razılaşmaq anlamına gəlir. Onların fikrincə, şura insan hüquqlarının ciddi şəkildə pozulduğu halları belə qınaya bilmir və bu səbəbdən ABŞ bu prosesdə iştirak etməyəcək.
ABŞ-ın Cenevrədəki nümayəndə heyəti bu qərarı artıq BMT İnsan Hüquqları Şurası və BMT-nin İnsan Hüquqları üzrə Ali Komissarlığına təqdim edib.
Reuters xəbər verir ki, əgər ABŞ cari dövri icmal dövrü çərçivəsində hesabat təqdim etməsə (bu dövr 2027-ci ilin iyulunda başa çatır), ilk dəfə olaraq bu öhdəliyi yerinə yetirməyən ölkə statusunu ala bilər.
