“2030-cu ilə qədər 100 milyard dollarlıq turizm hədəfinə çatacağıq və Türkiyə dünya turizmində nəhəng ölkələr sırasına daxil olacaq” – Ulusal.az xəbər verir ki, bu fikirləri Türkiyənin Mədəniyyət və Turizm Nazirinin müavini Nadir Alpaslan bildirib.
Türkiyə Turizm Tanıtım və İnkişaf Agentliyi ilə Türkiyənin turizm dəyərlərini xüsusilə sosial media və ya rəqəmsal mühitlərdə və media qurumlarında təbliğ etdiklərini bildirən nazir müavini Nadir Alpaslan qeyd edib ki, Türkiyə turizmdə indi yüksəliş dövrünü yaşayır.
“Bu tanıtımlarla ölkəmizin turizm gəlirlərini daha da artırmaq istəyirik. Bu yolla 2024-cü ildə turist sayını 56 milyondan 60 milyona çatdırmağı hədəfləyirdik. Keçən 9 ayda buna demək olar ki, nail olmuşuq. Bu il turizm gəlirlərimizi 60 milyard dollara çatdıracağıq. İqtisadi reallaşmalar göstərir ki, biz bu məqsədlərə asanlıqla nail ola bilərik. Ölkəmizin rifahı, insanlarımızın məşğulluğu kimi məsələlərdə 60 milyard dollar kimi bir rəqəmin nə qədər əhəmiyyətli olduğunu hamımız bilirik. Yaxın gələcəkdə bu 60 milyard dollarla kifayətlənməməyi planlaşdırırıq, amma inşallah 100 milyard dollara doğru möhkəm addımlar ataraq 2030-cu ilə qədər 100 milyard dollar hədəfinə çataraq Türkiyəni dünyanın turizmdə nəhəng ölkələrindən birinə çevirəcəyik. “-deyə Türkiyənin Mədəniyyət və Turizm Nazirinin müavini Nadir Alpaslan bildirib.
