Fevralın 27-də Daşkəsən Rayon İcra Hakimiyyətinin başçısı Əhəd Abıyev “Heydər Əliyev İli” çərçivəsində təsdiq olunmuş Tədbirlər Planına əsasən N saylı hərbi hissənin əsgər və zabitləri ilə rayonun Heydər Əliyev Mərkəzində “Heydər Əliyev və Azərbaycan Ordusu” mövzusunda görüş keçirib.
Əvvəlcə Ulu Öndər Heydər Əliyevin və torpaqlarımızın ərazi bütövlüyü uğrunda canlarından keçmiş şəhidlərimizin əziz xatirəsi yad olunub.
Görüşdə icra başçısı Əhəd Abıyev deyib: “2023-cü ilin mayın 10-da Ümummilli Lider, müstəqil Azərbaycan dövlətinin qurucusu, görkəmli siyasi və dövlət xadimi Heydər Əliyevin anadan olmasının 100 illiyi tamam olur. Prezident cənab İlham Əliyevin 29 sentyabr 2022-ci il tarixli Sərəncamı ilə Azərbaycanda 2023-cü il “Heydər Əliyev İli” elan olunmuşdur. Belə ki, Azərbaycan Ordusunun formalaşması müasir müstəqil dövlətimizin qurucusu, bütün ömrünü xalqının xoşbəxt gələcəyi, azadlığı uğrunda mübarizəyə həsr etmiş Ulu Öndər Heydər Əliyevin adı ilə bağlıdır. Bu gün Azərbaycan Silahlı Qüvvələri qarşısına qoyulan hər hansı tapşırığı yüksək səviyyədə yerinə yetirmək iqtidarına malikdir. Vahid komandanlığa tabe olan, müasir hərb elminin tələblərinə cavab verən Azərbaycan Ordusu Ümummilli Lider Heydər Əliyevin başladığı və Prezident cənab İlham Əliyevin uğurla davam etdirdiyi müdrik siyasət nəticəsində gündən-günə daha da möhkəmlənir, döyüş qabiliyyətini artırır”.
İcra başçısı çıxışında həmçinin 44 günlük Vətən müharibəsindən söz açıb, həmin döyüşlərdə Azərbaycan Ordusunun şanlı tarix yazdığını bildirib, qazandığımız tarixi Qələbənin müəllifi olan möhtərəm Prezident, Müzəffər Ali Baş Komandan cənab İlham Əliyevə, şanlı Azərbaycan Ordusunun əsgər və zabitlərinə, hərbçilərimizə, Vətən uğrunda canından keçən şəhidlərimizə, sağlamlığını itirən qazilərimizə borclu və minnətdar olduğumuzu vurğulayıb.
Əhəd Abıyev mövzunun bütün dövrlər üçün aktuallığını və hər bir Azərbaycan vətəndaşının qarşısında dayanan vəzifə olduğunu önə çəkərək qeyd edib ki, Ümummilli Liderin dövlətimiz, xalqımız qarşısında xidmətləri misilsizdir. Heydər Əliyevin fəaliyyəti bir məktəbdir. Hər bir Azərbaycan vətəndaşı bu məktəbi öyrənməyə borcludur.
N saylı hərbi hissənin zabiti Vəlizadə Elmin isə mövzu ilə bağlı məruzə ilə çıxış edib.
Sonda “Heydər Əliyev və müstəqil Azərbaycanın ordu quruculuğu” adlı sənədli filmə baxış keçirilib.
Elmar Əliyev – Vüqarlı
Daşkəsən RİHBA-nın İctimai-siyasi və
humanitar məsələlər şöbəsinin müdir müavini
