Ulusal.az xəbər verir ki, bu fikirləri Milli Məclisin deputatı Jalə Əhmədova səsləndirib. Millət vəkili bildirib ki, ölkə rəhbərliyinin bədən tərbiyəsi və idmanın inkişafına göstərdiyi yüksək diqqət və qayğı göz önündədir:
“İdmanın inkişafı istiqamətində görülən işlər, reallaşdırılan mühüm əhəmiyyətli layihələr, bölgələrdə istifadəyə verilən müasir idman kompleksləri, idmançılar üçün yaradılan yüksək şərait bir daha göstərir ki, Azərbaycan gənclərinin sağlamlığı dövlətimiz üçün prioritetdir və bu danılmaz faktdır. Beynəlxalq yarışlarda uğur qazanan idmançılarımızın ölkə başçısı tərəfindən qəbul edilməsini isə xüsusi vurğulamaq istərdim. Böyük fəxarət hissi ilə onu da qeyd edim ki, prezidenti olduğum Dünya Alpaqut Federasiyası (DAF) – türksoylu xalqların ortaq mədəniyyətini və Turan Döyüş Sənətini inkişaf etdirən yeganə beynəlxalq idman təşkilatıdır. Dünya Alpaqut Federasiyasının 2022-ci il ərzində xarici ölkələrdə keçirdiyi tədbirlər, ölkəmizi yüksək səviyyədə təmsil etdiyi çempionat və yarışlar, DAF-ın ICSSPE və TAFISA kimi mötəbər beynəlxalq idman təşkilatlarına üzv qəbul edilməsi, Federasiyanın dünyada daha çox tanınması və inkişafı istiqamətində nəzərdə tutulan tədbirlər planını Alpaqut Turan Döyüş Sənətinin dünyada tanıdılmasına mühüm töhfə kimi dəyərləndirmək olar. O cümlədən vitse-prezidenti olduğum Azərbaycan Autizm Assosiasiyası tərəfindən autizmli uşaqlar arasında bocce, stolüstü tennis, yüngül atletika, futbol, velosiped idman növü üzrə yarışların keçirilməsi autizmli şəxslərin reabilitasiyası baxımından mühüm əhəmiyyət kəsb edir. Xüsusi olaraq onu da qeyd edim ki, Birinci vitse-prezidentimiz Mehriban xanım Əliyeva, qızları Leyla Əliyeva və Arzu Əliyeva autizm spektrli uşaqlara mütəmadi olaraq baş çəkir, onların təhsil və gündəlik qayğılarını daim diqqətdə saxlayırlar. Təbii olaraq Birinci vitse-prezidentimizin bu istiqamətdə apardığı siyasəti və Heydər Əliyev Fondunun reallaşdırdığı çoxsaylı layihələri təqdir edir, dəstəkləyir və bacardığımız qədər bu uşaqlara yardım etməyə çalışırıq”.
Millət vəkili qeyd edib ki, dünyada idman ölkəsi kimi tanınan Azərbaycanda bədən tərbiyəsi və idmanın inkişafı daim dövlət başçımızın diqqətindədir:
“Ölkə başçısının idmana və idmançılara göstərdiyi diqqət və qayğını təqdir edir, bu istiqamətdə əlimdən gələni əsirgəmirəm. Təmsil etdiyim Salyan rayonunda idmançılarla görüşlər keçirir, onların qayğıları ilə maraqlanır, lazım olan köməkliyi göstərirəm. Salyan rayonunun Kürkənd kəndində AFFA-nın təşkilatçılığı, mənim şəxsi təşəbbüsümlə baş tutmuş futbol turniri, Salyan rayon boks məktəbində keçirilmiş boks turniri və s. digər yarışlar uşaq və gənclərimizin idmana marağını daha da artırmaq məqsədi daşıyıb. Çünki idman insana fiziki sağlamlıqla yanaşı, yüksək əhval-ruhiyyə və həyat eşqi bəxş edir. Əminəm ki, hər il olduğu kimi, 2023-cü ildə də Azərbaycan idmançıları ölkəmizi dünyada ləyaqətlə təmsil edəcək, idmanın bütün istiqamətlərində yüksək nailiyyətlər qazanacaqlar. Azərbaycanın üçrəngli bayrağını hər zaman yüksəklərdə görmək arzusu ilə bütün idmançılarımızı bir daha təbrik edir, onlara yeni-yeni nailiyyətlər arzulayıram”.
